د «ټلوېزیون یک» مسوول مدیر عبدالله خنجانی د ولسمشر د ساتونکي له لوري نن د حکومت د رسنیو مرکز کې ووهل شو.
ښاغلي خنجاني په یوې خبري غونډې کې وویل، د څارنوالۍ له حکمه پرته توهین او تحقیر، وهلو او ټکول، لنډمهالی توقیف او د شخصي وسایلو پلټنه د قانون خلاف عمل دی.
نوموړی د ده په حق کې بېاحترامي د ولسمشر د یو ساتونکي فردي کار بولي او له حکومت او عدلي بنسټونو غواړي چې دې ستونزې ته رسېدنه وکړي.
د ولسمشر ویاند هارون چخانسوري ـ چې دغه غونډه کې یې حضور لرلو ـ وايي، د اساسي قانون له مخې هېڅوک د بل کس د وهلو او ټکولو او سپکاوي حق نه لري او له هغو کسانو سره چې دغه عمل یې ترسره کړی، جدي چلند کېږي.
د خبریالانو ملاتړو بنسټونو څېړنې د خبریالانو پر وړاندې د تاوتریخوالي زیاتېدو ښکارندويي کوي.
د ژورنالیستانو ملي فدراسیون په کلني راپور کې راغلي چې د ۱۳۹۷ لمریز کال پر مهال په افغانستان کې ۲۰ خبریالان وژل شوي، لسګونه نور ټپیان او وهل او ټکول شويدي.
