د ټاکنو خپلواک کمېسیون مسوولان وايي، د ولسمشرۍ ټاکنو ته د ۱۷ نوماندانو د اسنادو څېړلو لړۍ یې نن پیل کړه او تر دوو اوونیو وروسته به یې لومړنی نوملړ اعلان کړي.
د ټاکنو خپلواک کمېسیون د ویاند مرستیال عبدالعزیز ابراهیمي سلاموطندار ته وویل چې یاده لړۍ یې نن پیل کړې او د لومړني نوملړ تر اعلان وروسته به د ولسمشرۍ نوماندانو په اړه شکایتونو او اعتراضونو ته هم وخت ورکړي.
په همدې حال کې د ټاکنیزو شکایتونو کمېسیون ویاند عليرضا روحاني وایي، دوی به د ټاکنو کمېسیون له لوري د ولسمشرۍ نوماندانو د اسنادو له څېړلو او د لومړني نوملړ تر اعلان وروسته د یادو نوماندانو په اړه د هېوادوالو د شکایتونو او اعتراضونو ثبتولو لړۍ پیل کړي چې دغه پروسه به یوه میاشت دوام وکړي.
دا په داسې حال کې ده چې د ولسمشرۍ نوماندانو د نوملیکنې موده تېره ورځ پای ته ورسېده او د ولسمشر محمداشرف غني او اجرایوي رییس عبدالله عبدالله په ګډون، ۱۷ کسانو د یادو ټاکنو لپاره ځانونه نومولي دي.
د ټاکنو خپلواک کمېسیون له لوري د اعلان شوي مهالوېش له مخې، راتلونکې ولسمشریزې ټاکنې به د ۱۳۹۸ کال د چنګاښ په ۲۹مه نېټه وشي.
