د هوايي چلند ملکي ادارې ویاند قاسم رحیمي وايي، د افغانستان هوايي چلند ملکي ادارې ۱۳۹۵ کال کې ۴،۳ میلیارده افغانۍ عواید لرل، چې دغه شمېره د تېر ۱۳۹۴ لمریز کال په پرتله ۱۵ سلنه زیاتوالي ښيي. د ده، په خبره تېرکال د دې ادارې عواید نږدې ۴ میلیارده افغانۍ و.
رحیمي وویل، سږکال ډېره بودیجه د هوايي ډګرونو په ترمینالونو لګول شوې او د څوو ولایتونو هوايي ډګرونه بشپړل شوي دي.
دی وايي، د کندهار، دایکندي او هرات ولایتونو د هوايي ډګرونو د تدارکاتو چارې پیل شوي او په ۱۳۹۶ لمریز کال کې به یې د میدانونو جوړولو چارې عملا پيل شي.
دغه راز غونډه کې د ترانسپورټ وزارت ویاند حکمت الله قوانج وویل، چې دغه وزارت په روان کال کې د افغانستان د ټولو مسافر وړونکو او باروړونکو شرکتونو او اتحادیو چارې ارزولي دي.
دی وايي، ترانسپورټ وزارت د ۳۴۱ ترانسپورتي شرکتونو او باروړونکو ټولنو جوازونه د دې له امله لغوه کړي، چې ترنسپورټي قوانین یې عملي کړي نه وو.
