راپورونه وایي، چې هندوستان او پاکستان سرحدي لوړ پوړي چارواکي د دواړو هېوادونو په سرحدونو کې د ځينو ستونزو له امله به راتلونکي میاشت په نوې ډهلي کې سره ناسته ولري.
دغه غونډه هر دوه کاله وروسته د دواړو هېوادونو ترمنځ د سرحدي ستونزو د هواري په موخه ترسره کيږي.
يو پاکستاني چارواکي د نوم نه ښودلو په شرط د پاکستان تربيون ورځپاڼې ته ویلي، چې په ۱۹۶۱ م ز کال د دواړو هېوادونو ترمنځ د شوې هوکړې له مخې په راتلونکي میاشت کې به دغه غونډه پېل شي.
دغه غونډه به د سپټمبر میاشتې په ۹مه نېټه پېل شي او شاوخوا څلور ورځې به دوام وکړي.
د دغې غونډې د همغږۍ ناسته تېره ورځ په واګه بندر کې د دواړو هېوادونو د چارواکو ترمنځ ترسره شوه.
که څه هم د پاکستان او هندوستان د ملي امنيت د سلاکارانو ترمنځ څو اوونۍ وړاندې ځينې خبرې تبادله شوې، چې په نتیجه کې د دواړو هېوادونو ترمنځ په روسیه کې د شوې اوفا تړون هم له کړکېچ سره مخ شو.
پاکستاني چارواکي ویل، چې د اوفا په تړون کې باید د کشمېر مسله هم شامله ده.
خو د پاکستاني چارواکو له لوري د دغې مسلې ذکر د هندي مقاماتو د غوسې پارولو لامل شو، چې په نتیجه کې د اوفا تړون د دواړو هېوادونو له لوري رد شو.
دغه ناسته به د پاکستان (ډي، جي، ایم، او) یا د نظامي عملياتو عمومي مشرانو او د هندوستان (بي، ایس، ایف) یا د سرحدي لوړ پوړو نظامیانو ترمنځ وشي.
که څه هم دواړو خواوو د اوفا تړون لغوه اعلان کړې، خو راپورونه وايي، چې د سرحدونو د ستونزو په هکله ناسته د اوفا تړون یوه برخه وه.
هندوستان او پاکستان په داسې حال د سرحدي ستونزو په اړه غونډه کوي، چې په دې وروستيو کې د دواړو هېوادونو ترمنځ په سرحدي سيمو کې څو وارې نښتې شوې، چې دواړو خواووته په کې مرګ ژوبله اووښتې ده.
