د تهران د هوايي پېښې د همغږۍ او د قربانیانو کورنیو ته د ځواب ویلو نړیواله ډله له ایرانه د يادې پېښې د قربانيانو کورنيو ته د تاوان غوښتنه وکړه.
افغانستان، کاناډا، انګلستان، اوکراین او سویډن هغه هېوادونه دي چې وګړي یې په ایران کې د اوکراینۍ الوتکې د لویدو له کبله وژل شوي دي.
د يادو هېوادونو د بهرنيو چارو وزيرانو تېره ورځ په لندن کې په يوه غنډه کې د يادې پېښې د څېړلو په موخه پنځه مادهييزه اعلاميه تصويب کړه.
د افغانستان په استازولۍ په دې ناسته کې د بهرنيو چارو سرپرست وزير ادریس زمان ګډون کړی و.
د بهرنيو چارو وزارت په يوه خپره کړې اعلاميه کې ويلي، چې د تهران د هوايي پېښې د همغږۍ او د قربانیانو کورنیو ته د ځواب ویلو نړیوالې ډلې په دې ناسته کې پرېکړه وکړه چې ايران دې د دې پېښې پوره مسووليت ومني او د قربانيانو کورنيو ته دې تاوان ورکړي.
د بهرنیو چارو وزارت خبرپاڼې زیاته کړې چې د غونډې برخهوالو د پېښې د بشپړې او جدي څېړنو غوښتنه وکړه.
شاوخوا دوه اوونۍ وړاندې په تهران کې د يوه اوکرايني هوايي شرکت د الوتکې د لوېدو له کبله ۱۷۶ کسان ووژل شول چې ۱۳ تنه يې افغانان وو.
