د هلمند د نادعلي ډېرې سیمې بېرته له طالبانو ونیول شوې

د هلمند د والې ویاند عمرځواک سلام وطندار ته وویل چې افغان ځواکونو په پنځو ورځنیو عملیاتو کې د نادعلي ولسوالۍ شین‌ کلی، خوشال کلی، هزاره‌ګانو کلا او ماته‌کې په نوم پراخه سیمې نیولې دي.

دی وایي، په‌دې عملیاتو کې ۶ طالبان او د هغوی ۲ موټرې له منځه تللې دي.

ښاغلي ځواک زیاته کړه، په‌دې عملیاتو کې دولتي ځواکونو ۱۵ کیلومتره پرمختګ کړی او د طالبانو د تګ ـ راتګ لارې یې بندې او امنیتې پوستې یې ځای پرځای کړې‌دي.

د هلمند د والي ویاند محمد عمر ځواک په وینا چې په عملیاتو کې د ملي اردو، ملي پولیسو او ملي امنیت له ځواکونو سره د امریکا سمندري ځواکونو هوایي ملاتړ هم شته.

ښاغلی ځواک زیاتوي، د نړیوالو ځواکونو په هوایي بریدونو کې د نشه‌یي توکیو یو کار ځای له منځه تللی دی.

افغان ځواکونه داسې مهال د هلمند نادعلي ولسوالۍ پراخو سیمو نیولو خبر ورکوي چې لا هم د دې ولایت پراخې سیمې د طالبانو په ولکه کې دي.