د هلمند او کندهار اوسېدونکي وايي چې د کجکي د برښنا مزي ان په یوه ورځ کې د امنیتي ځواکونو او طالبانو ترمنځ نښته کې دوه ځله هم پرې کېږي او د دوی زغم یې پای ته رسولی دی.
د دوی په وینا، ځینې وخت د برښنا پایې او مزي ژر بېرته وتړل شي، خو ډېری وخت څو ورځې برښنا نه وي چې د خلکو پر کاروبار یې منفي اغېز کړی دی.
د هلمند او کندهار اوسېدونکي له برښنا ریاست نه غواړي چې د دې ستونزې د حل لپاره بنسټیزه حللاره ومومي.
خو د هلمند د برښنا مسوولان وايي، یاد مزي ډېر کله د امنیتي ځواکونو او طالبانو ترمنځ نښتو کې پرې کېږي او تر هغې چې جګړه روانه وي، دا ستونزه به پر خپل ځای وي.
د هلمند د برښنا رییس وحیدالله عليزی وايي، په تېره یوه کال کې له کجکي نه تر لښکرګاه او کندهار پورې غځېدلي مزي د امنیتي ځواکونو او طالبانو ترمنځ د نښتو پر مهال شاوخوا ۲۰۰ ځله پرې شوي دي.
د نوموړي په وینا، دوی هڅه کوي چې د برښنا پرې شوي مزي بېرته سره ونښلوي، خو ځینې وخت امنیتي ځواکونه او طالبانو د برښنا کارکوونکو ته اجازه نه ورکوي چې سیمې ته ور شي.
د هلمند د برښنا رییس ناامني د برښنا د مزو پرې کېدو او بېرته یې د ژر نه تړل کېدو اصلي لاملونه بولي.
د یادونې ده چې څه موده مخکې د کجکي برښنا مزي په څلورو سیمو کې پرې شوي وو او د مسوولانو په وینا، درې برخې یې ژر وتړل شوې، خو د هلمند د سنګین ولسوالي په فتحمحمد پېچ سیمه کې د جګړې له کبله پرې شوي مزي له دوو اوونیو وروسته وتړل شول.
