د ولایتي شورا رییس کامران علیزي لهخوا د پوهنې ریاست دروازې تړلو ضربالعجل په غبرګون د دې ولایت سلګونو استوګنو اعتراضیه غونډه جوړه کړې وه.
اعتراض کوونکیو د هرات ولایتي شورا مشر کامران علیزي پر وړاندې شعارونه ورکړل او ویې ویل، چې علیزی زورواکي او خپلسري کوي.
په ولسي جرګه کې د هرات د خلکو استازی فرهاد مجیدي او د پوهنتون استاده مسعوده حسیني وايي، د خلکو لاریون د زورواکو پرضد غږ پورته کول دي.
دوی وايي، کوم کسان چې د ناپوهۍ له وجې راځي، خبرداری ورکوي او د پوهنې دروازه تړي؛ دغه اعتراضونه یې کلک ځواب دی.
تېره اوونۍ د هرات سلګونو اوسېدونکیو د دغه ولایت پوهنې ریاست پر وړاندې اعتراضیه غونډه جوړه کړه او د پوهنې رییس عبدالرزاق احمدي د استعفا غوښتنه یې کړې وه.
د دغه اعتراض په دوام د هرات ولایتي شورا مشر کامران عليزي یوې خبري غونډه کې تر یک شنبې ورځې د دغه ولایت د پوهنې ریاست دروازې په تړلو ټینګار کړی و.
د ولایتي شورا مشر د هرات د پوهنې رییس قومي اختلافونو ته په لمن وهلو او د پوهنې بهیر په سیاسي کولو تورن کړی و، خو د هرات پوهنې رییس دغه ادعاوې بېبنسټه بولي.
اوس چې د هرات سلګونه اوسېدونکي د پوهنې له رییس نه په ملاتړ راپورته شوي، د هرات والي ویاند جیلاني فرهاد وايي، د پوهنې بهیر ننګونو څېړلو په موخه هرات ته د ولسمشرۍ ماڼۍ او ولسي جرګې له لوري پلاوی تللی او دغه مسله به په هر اړخیزه توګه وڅېړي.
