د هرات ښاروال محمدداوود انوري پهدې وروستیو کې د یوه فېسبوک کاروونکي ته لیکلي، د ملت جوړونې اصول او قواعد حکم کوي چې د «خیابان» کلمې پر ځای باید «سړک» وکارول شي.
نوموړي ویلي، که څه هم د خیابان کلمې کارول ښه دي، خو په افغانستان کې د ملي هویت د تفکیک لپاره باید د ایراني رایجو کلمو له کارونې ډډه وشي.
د هرات ښاروال دغو څرګندونو د فرهنګپوهانو، مدني فعالانو او د خواله رسنیو کاروونکیو تند غبرګونونه را پارولي دي.
د هرات پوهنتون د ادبیاتو پوهنځي رییس عبدالغني خسروي او د هرات ښار د سړکونو نومونې کمېسیون پخوانی غړی د هرات ښاروال پر ناخبرۍ تورنوي او سلاموطندار ته وايي، په نهمه میلادي پېړۍ کې یوه ښکلې سیمه د خیابان وه چې د هرات د مشهورو معمارانو په لاس ښکلې شوې وه.
د نوموړي په وینا، کله چې په تیموري دوره کې هرات د ختیځ د رنسانس مرکز و او هرات د ټولو تیموریانو پلازمېنه وه، د عظمت خاوره وه، دا ولایت د خراسان پایتخت و او په دې سیمه د خیابان نوم اېښودل شوی؛ نو دا کلمه ایراني نه ده.
خسروي زیاتوي، د هرات د ځایونو او لارو د نومونې کمېسیون چې د هرات د وتلو پوهانو نه جوړ و، د اطلاعاتو او کلتور او ښاروالي ریاست سره په همغږۍ له میاشتو هڅو وروسته د دغه ولایت لارې ونومولې.
په همدې حال کې د هرات مدني فعال جواد عمید هم د ښاروال خبرې د خلکو له هویت سره لوبې ګني او وايي، دا ډول څرګندونې د دغه ولایت د اوسېدونکیو ترمنځ د کړکېچ او درځ رامنځته کولو لامل کېږي او ښاروال ته پهکار ده چې موږ ته د ترمېنالوژي راښودلو پرځای، خپلې چارې پر مخ یوسي.
دهرات ښاروال څرګندونو د نورو په پرتله د ټولنیزو شبکو د کاروونکیو ډېر غبرګون راپارولی دی.
د فېسبوک یو شمېر کاروونکیو ښاروال په ناپوهۍ تورن کړی او ځینو بیا دغه څرګندونې ریشخند ګڼلې دي.
د هرات اوسېدونکي وحید او حبیبالله وایي، د هرات ښاروال باید د سړکونو د نومونو پر ځای، ښارجوړونې ته پام وکړي او نوموړی د هرات تاریخي ښار په اړه مالومات نهلري.
موږ هڅه وکړه چې په دې اړه د هرات د ښاروال نظر هم واخلو، خو هغه او د ښاروالي چارواکي په دې اړه خبرو کولو ته حاضر نه شول.
خو د هرات ښاروالي پر خپلې فېسبوکپاڼې د یوې اعلامیې په خپرولو سره لیکلي چې د ښاري ځایونو د نومونې چارې له څو ورځو راهیسې د سیمهییزو ارګانونو د ادارې په لارښوونه پیل شوي او په نویو نومونو کې د سیمو او لارو نومونه هېڅ بدلون نه مومي.
