.jpg)
د ناټو لوی قوماندان جنرال کورتس سکاپروتي په افغانستان کې د بهرنیو ځواکونو له نوي قوماندان جان نیکلسون سره په لیدنه کې ویلي چې امریکا باید له افغانستانه د خپلو سرتېرو پر ایستلو بیا کتنه وکړي.
جنرال سکاپورتي وایي، چې د طالبانو بیا سرراپورته کول، پر لوی ګواښ د دې ډلې بدلیدل او دغه راز د څو استراتیژیکو سیمو سقوط سبب شوی، چې له افغانستان د بهرنیو ځواکونو وتلو ټوله کړنلاره بدلون وکړي.
ویل کیږي، په افغانستان کې د بهرنیو ځواکونو نوي قوماندان، په بروکسل کې د ناټو غړو هیوادونو له استازو سره په لیدنه کې د افغانستان جګړیز وضیعت قابو کولو طرحه د تړلو دروازو تر شاه ارزولې ده.
خو د افغان پوځ متقاعد جنرال خدای داد هزاره سلام وطندار ته وویل، چې تراوسه افغان امنیتي ځواکونه د هیواد امنیت ټینګولو توان نه لري او د بهرنیو ځواکونو سلا مشورې او همکاریو ته اړ دی.
"په افغانستان کې د بهرنیو ځواکونو حضور یوه ځانګړی ځای لري او د بهرنیو ځواکونو له ملاتړ پرته په خپلواکه توګه له هیواده دفاع او د افغان امنیتي ځواکونو ظرفیت لوړول ستونزمن دي."
په همدې حال کې د پوځ لوی درستییز جنرال قدم شاه شهیم نن پنجشنبه (می۱۹مه) خبري غونډه کې له نړیوالې ټولنې د افغان امنیتي ځواکونو د تمویل او تجهیز غوښتنه وکړه.
شهیم په ټینګار سره ویلي، چې په افغانستان کې د جګړې دوام نورو هیوادونه هم ناامنه کوي:" د هغوی تیرې تیروتنې په هېواد کې د ستونزو لامل شوې او دا ځل بیا هم افغان ملت د نړیوالې ترهګرې پر ضد مبارزه کې ولاړ دی چې نړیواله ټولنه دې په دې مبارزه کې افغانستان هېر نه کړي."
د تیر کال په مني کې ولسمشر اوباما اعلان و کړ، چې په افغانستان کې به د ۲۰۱۶ م زکال تر پایه ۹زره او ۸۰۰ امریکایي سرتیري پاتې شي. دا شمیره به له ۲۰۱۷ م ز کال وروسته ۵زره او ۵۰۰ سرتیرو ته راټیټ شي.
