یادې لوبډلې د امریکې وچې په (کوپا امریکا) فوټبال جام سیالیو کې وروستۍ فاینل لوبه کې دغه کارنامه ثبت کړه.
د ورکړل شویو معلوماتو له مخې، چیلي لوبډلې په خپل کوربتوب د (سن ټیانګو) په فوټبال نړېوال لوبغالي کې سرسختې سیالې ارجنټاینۍ لوبډلې په فاینل لوبه کې ماتې ورکړه او د اتلولۍ جام یې ترلاسه کړ.
د دواړو لوبډلو ترمنځ لوبه د قانوني او اضافه وخت ترپایه بې له کوم ګول برابره پای ته ورسیده، خو په (پنلټي) شوټونو کې چیلي د یوې یو اړخیزې لوبې وروسته ۱-۴ ارجنټاین ته ماتې ورکړه.
ویل کیږي دا په وروستیو ۹۹ کلونو کې لومړی ځل شو، چې د چیلي هیواد فوټبال ملي لوبډله د امریکې وچې د فوټبال سیالیو داتلولۍ جام ګټي.
په لوبه کې د ارجنټاین له پاره د فوټبال نړۍ د مشهوره لوبغاړي لیونیل میسي جادو هم په چیلي فوټبال لوبډلې ونه چلید او ارجنټاین ته یې په پنلټي شوټونو کې یواځې یو ګول ترسره کړ، خو خپلې لوبډلې ته یې د اتلولۍ جام و نه شو ګټلی.
د یادونې وړ ده، چې د لیونیل میسي په کپټانۍ کې تېرکال ارجنټاین د فوټبال نړېوال جام سیالیو فاینل لوبه هم المانۍ لوبډلې ته بایللې وه.
د امریکی وچې (کوپا امریکا) سترو فوټبال جام سیالیو کې په ۱۹۱۶ ز کال کې د لومړي ځل له پاره چیلي فوټبال ملي لوبډلې برخه اخیستې وه، خو په دې سیالیو کې یې د ۹۹ کلن انتظار وروسته دا تلولۍ تاج په سر کړ.
په دې فوټبال ټورنامنټ کې د امریکې وچې ۱۲ فوټبال ملي لوبډلو برخه اخیستې وه، چې د ۲۳ ورځو له پاره د چیلي هیواد ۹ لوبغالو په کوربتوب ترسره شو.
په سیالیو کې ټولټال ۲۶ لوبې ترسره شوې، چې په کې د اتلې چیلي وروسته ارجنټاین دویم ، پیرو درېیم او پرګوایې لوبډلې څلورم مقام ترلاسه کړ.
دغه سیالۍ څه باندې نیم میلیون نندارچیانو په لوبغالو کې دننه ننداره کړې، چې په کې ټولټال ۵۹ ګولونه ترسره شول.
د سیالیو په پای کې د پیرو فوټبالرپاولو ګوریرو او د اتلې چیلي فوټبالرایډوارډو وارګس په څلورڅلور ګولونو سره مخکښ ګول وهوونکي، د کلمبیا فوټبالرجیسن موریلو ځوان فوټبالر، د چیلي لوبغاړي کلاډیو براوو غوره ګول ساتوونکی اعلان شو ،خو د اخلاقو کپ بیا د پیرو هیواد فوټبال ملي لوبډلې ته ورکړل شو.
