د مخابراتو او معلوماتي ټکنالوژۍ وزیر عبدالرزاق وحیدي وايي، چې په تېره یوه اونۍ کې ۷۸ میلیونه دوسوه ۲۹ زره ۴۰۷ افغانۍ د مخابراتي شرکتونو د پېرېدونکو څخه د مالیې ګرځولو نه حکومت خزانې ته جمع شوي دي.
وحیدي نن د (سپټمبر په ۳مه) په یوې خبرې غونډې کې وویل، یواځې د عرفیې په ورځ له یو میلیون زیاتې افغانۍ د مخابراتي خدمتونو محصولاتو څخه جمع شوي دي.
ده زیاته کړه، چې د پېرېدونکو له کرېډیټ کارتونو څخه هره ګرځول شوې افغانۍ نیغ په نیغه د حکومت بودیجې ته ځي.
د مخابراتو وزیر وویل، ۷۶ سلنه دغه پیسې د هغو پېرېدونکو څخه د حکومت بودیجې ته جمع شوي دي، چې د ۵۰ افغانیو له کرېډېټ کارتونو څخه یې استفاده کړې ده.
د معلوماتو او ټکنالوژۍ وزیر وايي، چې دوی په وزارت کې د وخت معلومولو سیستم لري او د دغه سیستم له لارې د ټولو مخابراتي شبکو د پېرېدونکو شمېر او د بازار د فعالیتونو بدلون دوی ته معلومولی شي.
په ورته وخت کې د مالیې وزارت د پالیسۍ مرستیال شفیق احمد قاري زاده په دې خبري غونډه کې وویل، د هېواد بساینې یواځنۍ لاره د مالیې سیستم دی.
د قاري زاده پر وینا، دا لومړی ځل دی، چې له خلکو څخه مالیه د مخامخ سیستم له لارې حکومت بودیجې ته جمع کیږي او د بساینې په برخه کې لومړنی ګام دی.
همدا ډول د افغانستان د مخابراتي خدمتونو د تنظیم ادارې رییس ډاکټر محمد نجیب عزیزي وویل، د دغې ادارې موندنې ښيي، چې له ۸۰ میلیونو زیاتې افغانۍ د حکومت بودیجې ته جمع شوي دي.
د مخابراتو وزارت مسولین وايي، د مخابراتي خدمتونو له پېرېدونکو څخه یواځې په افغانستان کې نه بلکې د نړۍ په ټولو هېوادونو او په ځانکړې توګه ګاونډویو هېوادونو کې د مالیې دغه سیستم پلی شوی دی.
د مخابراتو نوي قانون پر بنسټ په هېواد کې د مخابراتي شرکتونو له ټولو کارونکو څخه ۱۰ سلنه مالیه د هر کار په جمع کولو د حکومت بودیجې ته وضع کیږي.
