د فراه د ولایتي شورا رییسه جمیله امیني وايي، تېره شپه شاوخوا ۲ بجې د دې ولایت په کاهکلا ولسوالۍ کې یوې ایراني چورلکې طالبانو ته وسلې، پیسې او مهمات ښکته کړيدي.
مېرمن امیني سلام وطندار ته وویل، د لاسته ورغلو معلوماتو له مخې، دغې چورلکې د طالبانو ترواک لاندې سیمه کې ۲ ساعته تېر کړي او د ګهیځ پر ۴ بجو بېرته تللې ده.
دا زیاتوي، چورلکې له کاهکلا ولسوالۍ نه ۷۳ میله وړاندې طالبانو ته ناسته کړېده.
د ولایتي شورا رییسه همداراز وايي، چې طالبانو د دغو مرستو د ترلاسه کولو سره سم سیمې ته نږې په دوو پوستو بریدونه کړي؛ په پایله کې یې یو پوسته نیولې او د بلې هغې ۳ پولیس یې وژلي او ۳ نور یې ټپیان کړي.
دغه راز د فراه د والي ویاند ناصر مهري وايي، د ولسي خلکو په وسیله یې ځېنې راپورونه ترلاسه کړي؛ خو د کره کولو او موثقو معلوماتو د ترلاسه کولو لهپاره کشفي بنسټونو څېړنې پیل کړېدي.
خو ناصر مهري د فراه شیب کوه ولسوالۍ په شیخان کاریز کلي او د پشت کوه ولسوالۍ کې د امنیتي ځواکونو په پوستو د طالبانو بریدونه تاییدوي.
دی وايي، پهدې بریدونو کې ۶ سرتېري او ۵ طالبان وژل شوي؛ خو زیاتوي، معلومه نهده، چط د طالبانو دغه بریدونه د چورلکې په ناستې پورې تړاو لري او که نه.
د فراه د امنیې قوماندان اقبال بایر ویاند هم د فراه په شیب کوه او پشت کوه ولسواليو کې د امنیتي ځواکونو په پوستو د طالبانو بریدونه ومنل.
په هرات کې د لویدیځ زون لهپاره د ایران سرکونسل محمود افخمي رشیدي فراه ولایت ته د ایران څرخکې راوښتلو او وسلهوالو طالبانو ته د وسلو او مهماتو د ښکته کولو موضوع په جدي توګه ردوي.
دا پهداسې حال کې ده، چې شاوخوا دوې اوونۍ مخکې رسنیو راپورنه خپاره کړل، چې له پاکستان سره په پوله د دغه هېواد هوايي ځواک د ایران یوه بېپيلوټه الوتکه ویشتلې وه.
