د ملګرو ملتونو د سازمان کارکوونکي، چې د ناامنیو له کبله د فاریاب د میمنې له ښاره مزارشریف ته تللي وو؛ بېرته په یوه اونۍ کې دغه ښار ته ورستنېږي.
په هېواد کې د شمال زون د یوناما دفتر مسولان وايي، چې د یوناما، یو اېن سي اېچ سي ار، یونیسف او ډبلیو اېف پي سیمه ییزو ادارو د وروستیو ناامنیو او پر دغه ښار باندې د طالبانو د احتمالي برید په اړه له میمنې نه وتلي وو.
په شمال زون کې د یوناما دفتر ویاند لطف الله بارز سلام وطندار سره په خبرو کې وویل، چې په فاریاب کې د دغه سازمان کارونه نه دې درېدلي، بلکې په موقت ډول یې دروازې تړلې دي.
په ورته وخت کې د دې ولایت امنیتي مسولان وايي، چې امنیتي حالات ښه شوی دی او په ښار کې هیڅ ډول امنیتي ستونزه نه شته.
د فاریاب د امنیت امر سمونوال بریالی بشریار پرواني سلام وطندار ته وویل، چې د ملګرو ملتونو سازمان کارکوونکي به راتلونکو دوو ورځو کې بېرته دغه ولایت ته راستانه شي او په دې ولایت کې مېشت ټول امنیتي ځواکونه د دوی او د خلکو د امنیت د خوندي کولو له پاره تر خپلې وسې پورې هڅې کوي.
د ملګرو ملتونو د سازمان کارکوونکي ۸ ورځې وړاندې په ناڅاپي ډول د میمنې له ښاره ووتل او په مزارشریف کې د دغه دفتر مرکز ته ولاړل.
