وروسته له څو کلونو ایران او د نړۍ پياوړي هېوادونه تېره پنجشنبه يو هستوي هوکړې ته ورسېدل او دغه هوکړه د افغانستان د اوسېدونکو له هرکلي سره هم مخ شو.
د سويس په لوزان ښار کې وروسته له ډېرو خبرو اتر نه ایران او د نړۍ شپږ پياوړي هېوادونه و توانېدل، چې د يوې بيانيې په خپرولو سره د ایران هستوي پروګرام نه خپل ابتدايي هوکړه اعلان کړي.
د افغانستان د پارلمان غړي د ۱+۵ هېوادونو له هوکړې هر کلی کوي او وايي، چې له ایران سره د نړۍ پياوړو هېوادونو هوکړه به د افغانستان پر امنيتي وضعيت مثبت اغیز وکړي.
د ولسي جرګې غړی سید فکوري بهشتي سلام وطندار ته وویل، چې له ایران سره د امريکا لومړني توافقات به د افغانستان په ګټه تمام شي.
همدارنګه د ولسي جرګې بل غړی احمد شهيدزاده وايي، د نړۍ پياوړي قدرتونه د خپلو ګټو پسې ګرځي، خو ښه به دا وايي، چې د ايران د اټومي پروګرام په شان ستونزې په سوله ییزه فضا کې حل شي.
اخوا د افغانستان پخواني ولسمشر حامد کرزي هم د يوې خبرپاڼې په خپراوي سره د ایران له هستوي پروګرام څخه د نړۍ پياوړو هېوادونو له مقدماتي پرېکړو هرکلی کړی او دغه پرېکړه يې د افغانستان په ګټه بللې ده.
کرزي ويلي، چې د دوی هوکړه به د سيمې او نړۍ د امنيت په برخه کې مثبت تمام شي.
نوموړې هيله څرګنده کړې، چې کېدای شي دواړه خواوې په راتلونکي کې هم وروستي پرېکړې ته ورسيږي.
د پوهنتون استاد او د سياسي چارو کارپوه طاهر هاشمي وايي، چې افغانستان به د هر هغې هوکړې هر کلی وکړي، چې پایله يې د سيمې او نړۍ د سولې او ثبات په ګټه وي.
د دغې هوکړې پر بنسټ به ایران د یورانيمو غني کولو ته کموالی ورکړي او پرځای به يې نړيوال په څو مرحلو کې خپلو اقتصادي تحريمونه له منځه یوسي.
