هرات کې له ملکي وګړيو د خوندیتوب ډله د کورونا ویروس په اړه د لرې پرتو سیمو د اوسېدونکيو پر نه پوهاوي اندېښنه څرګندوي.
د يادې ډلې مسوول سید اشرف سادات یوې خبري غونډه کې وويل، د امنیتي ګواښونو له کبله د لرې پرتو سیمو اوسېدونکي د کورونا ویروس د خپرېدو ګواښ په اړه بېخبره پاتې دي.
سادات وايي، د جګړې او ناامنیو په دوام سره به د هېواد په ځانګړې توګه د هرات لرې پرتو سیمو ته روغتیايي خدمات ونه رسېږي.
نوموړی له طالبانو غواړي چې د کورونا ویروس له منځه تلو پورې اوربند اعلان کړي، ترڅو روغتیايي ډلې وکولی شي، د هرات او لوېدیځ زون لرې پرتو سیمو ته خدمات ورسوي.
هرات کې له ملکي وګړيو د خوندیتوب ډلې غړی سید سبحان رستګار هم ټینګار کوي چې جګړه لامل کېږي، ترڅو کورونا ویروس لرې پرتو سیمو کې انساني ناورین رامنځته کړي.
خو د دغې ډلې غړي خبرداری ورکوي، که د دولت مخالفین تاوتریخوالي ته دوام ورکړي او کورونا ویروس سره د مبارزې لپاره سره یو موټی نهشي، د لرې پرتو سیمو ګڼ شمېر اوسېدونکي به د کورونا په خپرېدو سره خپل ژوند له لاسه ورکړي.
د هرات روغتیايي مسوولان هم له طالبانو غواړي چې ولسوالیو کې د روغتیايي کارکوونکيو د فعالیت مخه ونه نیسي.
تر دې وړاندې د عامې روغتیا وزارت هم له طالبانو غوښتي وو چې ولسوالیو کې د دغه وزارت روغتیايي ټیمونو سره همکاري وکړي.
