د ملي یووالي حکومت سیاسي هوکړه لیک تر اوسه نه دی پلي شوی

شنونکي وایي، چې د ملي یووالي حکومت د مشرانو غوښتنې او په ټولنه کې له ځېنو کړیو ډارېدل د سیاسي هوکړه لیک د مادو د نه پلي کېدو لامل شوي دي.

د سیاسي چارو د شنونکو پر باور، د حکومت مشران د ځېنو کړیو د امر لاندې دي، همدا لامل دی چې په قوانینو کې د سمون راوستلو او یا په نظام کې د بدلون له پاره له دې کړیو سره یوځای کار کوي.

د پوهنتون استاد او د ټاکنو د اصلاح د ځانګړي کمېسون غړي علي امیري سلام وطندار ته وویل، چې په ټولنه کې د ځېنو کړیو او کسانو له خوا د ملي یووالي پر حکومت فشار د دې لامل شوی، چې د حکومت مشرانو ونه شو کولې، چې په ازادنه ډول لویه جرګه جوړه کړي او په اساسي قانون کې تعدیلاتو د راوستلو ترڅنګ؛ د لومړي وزیر څوکۍ ته په قانون کې ځای ورکړي.

د ده په خبره، حکوت په خپل ځان باور نه لري، ځکه خو د کمزوري هوډ په لرلو سره له ټولنیزو کړیو وېرېږي او یو ولسي خوځښت نه شي رامنځته کولی.

خو سیاسي شنونکی نعیم نظري وایي بیا وايي، چې د حکومت مشران په سیاسي هوکړه لیک هېڅ باور نه لري او د هغوی ټولې غوښتنې د دې لامل شوې دي، چې نه ولسمشر غني او نه هم ډاکتر عبدالله دې ته لېواله دی چې یو بل ومني.

نظري زیاتوي، چې نړۍ والې ټولنې باید د ملي حکومت جوړولو په لومړیو کې د سیاسي هوکړه لیک په پلي کولو کې جدي څارنه کړی وی، چې د حکومت مشرانو دغه هوکړه لیک ته په کمه سترګه نه وی کتلی.

په ورته وخت کې د ملي یووالي حکومت د سیاسي هوکړه لیک د څارنې  کمېسون رییس محمد ناطقي سلام وطندار سره په خبرو کې وویل، چې د ملي یووالي حکومت د مشرانو په دې دوو کلونو کې د دغه هوکړه لیک د پلي کولو په اړه جدي کار نه دی کړی او دغه ژمنې یوازې پر کاغذ پاتې شوې دي .

د ناطقي په خبره، د ملي یووالي حکومت باید په دغو دوو کلونو کې د سیاسي هوکړه لیک په پلي کولو کې جدي ګامونه اخیستل شوی وی، چې خلک له حکومته نه وی لېري شوی.

سره له دې، د اجرایوي ریاست د ویاند مرستیال امید میثم سلام وطندار ته وویل، چې په نږدې راتلونکې کې به د سیاسي هوکړه لیک ټولې مادې د ملي یووالي حکومت د مشرانو له خوا پلي شي.

د ده په خبره، د ملي یووالي حکومت هڅه کړې، ځېنې ژمنې عملي کړي خو په ځېنو یې کار روان دی، چې په نږدې راتلونکې کې به پلې شي.

میثم ټینګار وکړ، چې د سیاسي هوکړه لیک په پلي کولو کې د ملي یووالي حکومت د مشرانو ترمنځ هېڅ اختلاف نه شته.

سیاسي کارپوهان په دې اند دي، که سیاسي هوکړه لیک پلي نه شي؛ حکومت به د مشروعیت له بحران سره مخ شي او خلک به د هېواد په سیاسي راتلونکی خپل باور له لاسه ورکړي.