د طالبانو له لوري په تازه راپور کې ویل شوي دي، چې د ملاعمر مشر زوی «مولوي محمد یعقوب مجاهد» د رهبري شورا غړی او په نظامي کمېسیون کې د افغانستان د ۱۵ ولایتونو د نظامي مسوول په توګه ټاکل شوی دی.
د وسله والو طالبانو په شهامت وېبپاڼه کې د خپور شوي راپور له مخې د ملاعمر ورور ملا عبدالمنان عمري ته هم د طالبانو له خوا نوی دنده ورکړ شوې ده.
د دوی د راپور له مخې ملا عبدالمنان عمري د «اسلاميامارت د رهبري شورا د غړي او د دعوت او ارشاد کمېسیون د رییس په توګه ګومارل شوی دی.»
دغه راپور پرون (دوشنبه) د وري میاشتې پر ۱۶مه نېټه خپور شوی دی.
د سیاسي چارو شنوونکی د طالبانو دا ډول نوي تشکیلات د داخلي ستونزو د ختمولو له پاره نوې حل لاره ګڼي.
د سیاسي چارو شنونکی وحید مژده په دې اړه سلام وطندار سره په مرکه کې وویل، چې وسله والو طالبانو دغه کار د خپلو منځي ستونزو د حل له پاره کړی دی.
دی زیاتوي، چې د ملاعمر زوی ملایعقوب د پاکستان د کراچۍ ښار په مدرسه کې دیني زده کړې کړې دي او نوموړي په نظامي برخه کې تجربه نه لري. ده زیاته کړه، چې د ملاعمر ورور ته سمبولیکه دنده ورکړل شوې ده.
مژوده وویل، چې د طالبانو په تحریک کې د ننه ځېنې مشرانو اندېښنې لرلې، چې د طالبانو له تحریکه د ملاعمر کورنۍ ویستل شوې ده او دوی دغه کار د دغو اندېښنو د له منځه وړلو له پاره کړی دی.
د مژده پر وینا، د نویو کسانو ګومارل به د سولې او جګړې په خبرو ځانګړې اغېزه ونه کړي.
د ملي دفاع وزارت د ویاند مرستیال رادمنش د طالبانو دا تشکیل د عامه ذهنونو د خرابولو او د تبلیغاتو یو ډول ګڼي او زیاتوي، چې دا کار به د ملي ځواکونو په امنیتي او دفاعي حالت باندې کومه ځانګړې اغېزه ونه کړي.
د رادمنش پر وینا، افغان امنیتي ځواکونو د نوي جنګي فصل له پاره پوره چمتو والی لري او د دې کار له پاره یې د شفق په نامه عملیات پیل کړي دي، چې د ملي بشپړتیا د ساتنې او د دوښمن د خصمانه عملونو په مقابل کې به خورا ګټور تمام شي.
د طالبانو د لومړي مشر ملامحمد عمر له مړینې وروسته د طالبانو ترمنځ د مشر د ټاکلو پر سر جنجالونه راپيدا شول او دوی یې په دوو ډلو ووېشل.
وسله والو طالبانو په داسې حال کې دغه خبر پور کړی دی، چې شاوخوا دوه اونۍ مخکې د افغان امنیتي ځواکونو لوړپوړي چارواکي د ولسي جرګې په استجوابیه غونډه کې وویل، چې سږکال به په جنګي موسم کې طالبانو خپلو بریدونو ته زور ورکړي.
د ملي امنیت سرپرست رییس مسعود اندرابي جرګې ته ویلي وو، چې د پاکستان د استخباراتو څارګره اداره اوس هم له وسله والو طالبانو مخامخ ملاتړ کوي.
په ورته وخت کې غونډې ته د افغانستان لوی درستیز ویلي، چې دوی د وسله والو طالبانو د ځپلو له پاره یې په ټول هېواد کې د شفق په نوم یرغلیز عملیات پلان کړي دي.
