د سولې په چارو کې د دولت وزارت وايي، په دې اړه پرمختګونه شوي او ډېر ژر به دغه شورا د عبدالله عبدالله په مشري جوړه او سیاسي کړکېچونه هم هوار شي.
د دغه وزارت وزیر سلام رحیمي په کابل کې له رسنیو سره په خبرو کې ویلي چې د ولسمشر غني او عبدالله عبدالله ترمنځ د شته اختلافونو په هوارولو کې پرمختګونه شوي او ډېر ژر به د مصالحې عالي شورا د عبدالله په مشري جوړه شي.
رحیمي زیاته کړې چې له طالبانو سره د سولې مرکچي پلاوي غړي به هم د دغې شورا له خوا وټاکل شي.
خو د عبدالله عبدالله په مشري د ثبات او همپالنې ټیم غړی امید میثم وايي، دغه ټیم ژمن دی چې د سیاسي اختلافونو هوارولو او دغه راز له روان ناورین نه د وتلو لپاره مناسبه حللاره په پام کې ونیول شي او له مخې یې یو پراخ مشارکتي حکومت جوړ شي.
د میثم په خبره، د ټولشموله حکومت جوړولو لپاره چنې وهل وروستۍ شوي او ډېر ژر به دغه طرحه له ارګ سره شریکه شي.
د سیاسي چارو شنونکی احمدشکېب منتظري وايي، د مصالحې شورا مشر په توګه د عبدالله عبدالله حضور د روانو سیاسي اختلافونو د له منځه وړلو لپاره مناسبه حللاره ده.
دا خبرې داسې مهال کېږي چې تازه اروپایي ټولنې د افغانستان له ټولو ښکېلو اړخونو د روان سیاسي کړکېچ د پای ته رسولو غوښتنه کړې ده.
د غني او عبدالله ترمنځ سیاسي اختلافونه د تېر کال د تلې شپږمې د ولسمشري ټاکنو د پایلو له اعلان وروسته پیل شوې.
د ټاکنو خپلواک کمېسیون ولسمشر محمداشرف غني د یادو ټاکنو بریالی اعلان کړ، خو عبدالله عبدالله پایلې ونه منلې.
د دغه سیاسي کړکېچ هواري لپاره د سیاسي شخصیتونو منځګړتوب هم تر اوسه د پام وړ پایله نه ده لرلې.
