د بلخ ولایت د کرېکټ لوبغالي او د مزارشریف هوایي ډګر واټ د بنسټ ډبرې د جلا مراسمو په ترڅ کې کېښودل شوې. د هوايي ډګر واټ د ۲.۸ کیلومتره په اوږدوالي په څلورو لیکو کې د ۴۰ متره سور په درلودلو سره په معیاري بڼه جوړېږي.
د مزارشریف هوایي ډګر جوړېدو لګښت ۳ میلیونه ډالر اټکل شوی چې هند پرغاړه اخیستی دی.
په کابل کې د هند سفیر ویني کمار په دې اړه جوړو شویو مراسمو ته وویل هېواد یې له افغانستان سره اوږدمهاله مرستو ته ژمن دی.
دغه راز، په یوه بله غونډې کې د یو میلیون ډالرو په ارزښت د افغانستان کرېکټ لوبغالي بنسټ ډبره کېښودل شوه. ټاکل شوې دغه لوبغالی تر راتلونکي یو کال پورې د ۲۰ زره نندارچیانو په ظرفیت پر ۲۰ جریبه ځمکه په معیاري بڼه جوړ شي.
مراسمو ته د بلخ والي محمد اسحاق رهګذر د هند له مرستو د مننې ترڅنګ وویل چې د یاد هېواد سفیر ژمنه کړې د بلخ پوهنتون څو پوهنځیو لهپاره معیاري ودانۍ هم جوړې کړي.
سره له دې چې په روان کال کې د بلخ کرېکټ غوره شوې لوبډلې د شمال زون په سیالیو کې لومړی مقام خپل کړ د کرېکټ لوبغاړي لاهم پر غیرمعیاري ډګرونو تمرینونه کوي. د دې لوبډلې غړي د کرېکټ لوبغالي جوړولو کار په پیل خوښي ښیي او هیله من دي چې د دغه لوبغالي کار ډیرژر بشپړ شي.
