له دې وروسته به د افغانستان په لويديځ هرات ولایت کې د مجرمينو او تورنو کسانو دوسیې په الکترونيکي بڼه څېړل کيږي.
نن سه شنبه (اګست ۲۵ مه) د یاد ولایت په امنيې قومندانۍ او په عدلي او قضايي ارګانونو کې د قضيو د مديریت سیسټم په رسمي ډول فعال شو.
له نن څخه شاوخوا درې کاله وړاندې پر دغه سیسټم د (جي، ایس، ایس، پي) ادارې له خوا د هرات په امنيې قومندانۍ کې کار پېل شو.
د هرات د استيناف څارنوالۍ رییس سميع الدین رهين د دغه سيسټم په پرانست غونډه کې وویل، چې له دې وروسته به ټولې قضيې د کشف له مرحلې نيولې تر اجرا او مجازاتو پورې به د دغه پرمختللي سیسټم له لوري پلټل کيږي.
هغه وايي، له دې وړاندې ټولې قضيې د يو زوړ سیسټم له لارې پلټل کېدلې، چې یو شمېر زياتو قضيو ته په وخت رسېدنه هم نه کېدله.
د هرات ولایت ځينې مسؤلین وايي، چې د دغه سیسټم له لارې به شفافیت رامنځ ته شي او د متهمينو قضيو ته به په وخت رسېدنه هم وشي.
په همدې حال کې د هرات ولایت د استيناف محکمې رییس عبدالغفار زبير وویل، چې له دې وړاندې د مجرمينو او تورنو کسانو دوسيو ته رسنۍ هم لاسرسی نه درلودلې، خو اوس يواځې د انټرنېټ له لارې دوی کولی شي، چې د محکمې له هر ډول پريکړو خبر شي.
