د امریکا د متحدهایالاتو او طالباستازیو ترمنځ د سولې د خبرو اترو پنځم پړاو خبرې دولسمې ورځې ته وغځېدلې.
د راپورونو پر بنسټ، پهدې پړاو غونډې کې پر څلورو موضوعګانو، له افغانستانه د امریکایي ځواکونو پر وتلو، له القاعده او نورو تروریستي ډلو سره د طالبانو د مرستو پر پرېکون، دواړه طرفه اوربند او له افغان حکومت سره د طالبانو د مذاکرو پر پیلېدو خبرې روانې دي.
تر اوسه رسمي سرچینو د دوحې غونډې د جزیاتو په اړه څه نهدي ویلي؛ خو طالبانو ته نږدې یوې سرچینې سلام وطندار ته ویلي چې د امریکا متحدهایالات له طالباستازیو سره د موضوعګانو پر اساسي اصولو هوکړې ته رسېدلي؛ خو د هوکړې د جزیاتو په اړه تمرکز د غونډې د اوږدېدو لامل شویدی.
د سرچینې په خبره، د اساسي ستونزو د رفعکولو لپاره طالبان د سولې د هوکړهلیک د جزیاتو په اړه حساس دي او هڅه کوي چې د سولې هوکړهلیک هېڅ ډول ابهام سره مخ نهشي.
سر چینه وايي، د سولې د هوکړهلیک په لیکنۍ ژبې بحث شوی او طالب اړخ غواړي چې هوکړهلیک د هېواد په یوه ملي ژبه ولیکل شي.
په وروستیو میاشتو کې د افغانستان سولې بهیر په اړه د امریکا هڅې ګړندۍ شوېدي او د افغانستان سولې لپاره د امریکا ځانګړي استازي زلمي خلیلزاد له طالباستازیو سره تراوسه پنځه ځلې کتلي او خبرې یې ور سره کړېدي.
نږدې دوې اوونۍ مخکې ښاغلي خلیلزاد د امریکایي مذاکرهکوونکیو په مشرۍ د طالباستازیو سره د قطر په دوحه کې د خبرو اترو پنځم پړاو پیل کړیدی.
ورته مطالب:
طالبان؛ افغانستان به د ترهګرو پر ځاله نه بدلېږي
«حکومت او سیاستوال دې د سولې په اړه ګډ دریځ غوره کړي»
