د افغانستان فوټبال ملي لوبډله د تایلنډ پر وړاندې د ماتې خوړلو وروسته د اسیا غوره جاپانۍ فوټبال ملي لوبډلې خلاف لوبېدو له پاره د ایران پلازمېنې تهران ته ورسېده.
د افغانستان فوټبال فدراسیون د یوې خبرپاڼې په خپرولو سره وایي، چې ایران ته په رسېدو افغان فوټبال مینه والو لوبډلې ته تود هرکلې ووایه.
د یادونې وړ ده، چې افغان فوټبال ملي لوبډله د جاپان خلاف مهمې سیالۍ ته د ښه چمتووالي په موخه نن او سبا ورځې لري.
ټاکل شوي ده، د افغانستان او جاپان فوټبال ملي لوبډلو ترمنځ به د روسیي په کوربتوب ۲۰۱۸ کال فوټبال نړیوال جام سیالیو ته د اسیا لومړي پړاو دغه مهمه لوبه به په افغانستان کې د امنیتي ستونزو له کبله په ایران کې خو د افغانستان په کوربتوب د سبټمبر په ۸ مه نېټه د راتلونکې سې شنبې په ورځ مازیګر ۵ بجې پېل شي.
افغان فوټبال ملي لوبډله په داسې حال کې د جاپان خلاف لوبې له پاره ایران ته رسیږي، چې د تېرې پنجشنبې په ورځ یې د تایلنډ په پلازمیېنه (بنکاک) کې کوربه لوبډلې په یوه نړیواله دوستانه سیالۍ کې ۰-۲ ماتې وخوړه.
افغان فوټبال فدراسیون د تایلنډ خلاف ماتې سره سره د جاپان خلاف سیالۍ ته د خپلې ملي لوبډلې په تیاریو ډاډ ښایي، چې ښه پایله به ولري.
د یادونې وړ ده، چې نړېوال جام ته په روانو اسیایي ټاکنیزو سیالیو کې افغانستان تراوسه په پنځم (اې) ګروپ کې ۲ لوبې ترسره کړي دي، چې سوریه ته یې ۰-۶ ماتې خوړلې خو له کمبودیا څخه یې لوبه ۰-۱ ګټلې ده.
هېره دې نه وي، چې په روانو لوبو کې تراوسه افغانستان د ۲ لوبو وروسته د سوریه لوبډلې څخه وروسته د ګډون کوونکو ۵ لوبډلو په کتار کې دویم مقام له ځان سره لري.
