د اداري فساد او درنو جرمنو سره د مبارزې عدلي او قضايي مرکز یو تورن کس په ۱۰ کلونو او ۸ میاشتو تنفیذي بند محکوم کړ.
محکوم کس فرید احمد نومیږي، دی په کندهار کې د عزیزي بانک د مرستیال زوی دی او اوس د مالي اختلاس په جرم محکوم شوی دی.
د درنو جرمونو او اداري فساد پر وړاندې د مبارزې عدلي او قضایي مرکز لومړنۍ محکمه د شنبې په ورځ کابل کې ترسره شوه.
په دې محکمه کې یو بل تن د بډو په تور محکوم شوی، خو دغه کس له محکمې نه د وخت غوښتنه وکړه او د محکمې د پریکړې له مخې د یاد تورن کس محاکمه تر بلې شنبې پورې وځنډېده.
خو په کندهار کې د عزیزي بانک د مرستیال محمد هاشم زوی، فرید احمد د۱۵۲ زرو او ۵۰۰ امریکایي ډالرو د اختلاس په جرم په ۱۰ کاله او ۸ میاشتې تنفیذي بند محکوم شو.
د محکمې په بهیر کې تورن کس موظف څارنوال ونګاوه او د اسنادو وړاندې کولو غوښتنه یې وکړه، خو څارنوال د تورن کس په ځواب کې وویل، د هغه داختلاس دوسیه د یو باصلاحیته پلاوي له خوا څیړل شوې ده.
د دواړو خواوو له دعوې وروسته د درونو جرمونو او اداري فساد پرضد د مبارزې د عدلي او قضایي مرکز رییس شیراقا منیب وویل، چې تورن کس د اختلاس او بانکي اسنادو د جعل په جرم محکمه شوی دی.
د منیب پر وینا، تورن فرید احمد د اختلاس ترڅنګ، په څلورو مواردو کې په بانکي اسنادو کې په جعل کاري هم تورن دی.
نوموړي زیاته کړه، چې د محکمې پریکړه روستۍ نه ده او تورن کولای شی د استیناف غوښتنه وکړي.
د ویلو ده، چې د درنو جرمونو او اداري فساد پرضد د مبارزې عدلي او قضایي مرکز د فساد دوسیو ته د رسیدنې محکمه به له دې وروسته د اداري فساد د مخنیوي په موخه دوام وکړي.
