د فاریاب ولایت سیمه ییز مسولین وايي، چې د غورماچ ولسوالۍ امنیه قومندان عبدالمجید ګلیم باف د ۱۳ امنیتي سرتېرو سره وژل شوی دی.
د دغه ولایت د سرې میاشتې رییس خال میرزا صبوري سلام وطندار سره په خبرو کې وویل، چې د غورماچ ولسوالۍ جګړې د وژل شویو کسانو د جسدونو د لېږدولو پر مهال یې د دغې ولسوالۍ امنیې قوندان په ګډون ۱۳ نور امنیتي سرتېرو جسدونه هم لیدلي دي.
د فاریاب امنیې قومندانۍ جنايي مدیر سربلند حشام د دغه خبر پخلی کوي او وايي، چې د ګلیم باف جسد یې کورنۍ ته سپارل شوی دی.
له دې مخکې د دغه قومندان د وژل کېدو په اړه ضد او نقیص راپورونه خپاره شوي وو.
د حشام پر خبره، ګلیم باف د تېرې اونۍ په اوږدو کې وژل شوی و.
د غورماچ ولسوالۍ امنیې قومندان له ۳۰ تنو سرتېرو سره دریې ورځې د وسله والو طالبانو په کلابندۍ کې وو.
ویل کیږي، ګلیم باف د کلابندۍ پر مهال څو ځلې له مرکز څخه د هوايي مرستې او تازه دمو ځواکونو د مرستې غوښتنه کړې وه، خو امنیتي مسولینو یې غوښتنه نه وه ځواب کړې.
عبدالمجید ګلیم باف پخوانۍ جهادي قومندان و، چې د پولیسو په لیکو کې له شاملېدو وروسته د غورماچ ولسوالۍ د امنیې قومندان په توګه وګومارل شو.
په فاریاب ولایت کې د ملي اردو ۲۰۹ شاهین قول اردو د لومړۍ لوال ویاند محمد رضا رضايي سلام وطندار ته وویل، چې په سیمه کې د ملي اردو په رهبر د "شمشیر۱۵ " په نوم عملیات پيل شوي دي.
دی وايي، چې د دغو عملیاتو په ترڅ کې یې د غورماچ ولسوالۍ د وسله والو طالبانو د کلابندۍ خط مات کړی دی او په دغه ولسوالۍ کې امنیتي ځواکونو سره یوځای شوي دي.
رضايي وايي، چې په غورماچ ولسوالۍ کې له ۸۰۰ زیات امنیتي سرتېري د وسله والو طالبانو له لوری کلابند شوي وو.
ویل، چې دغه نوي تازه دمي سرتېري د چهارشنبې، کنجک، دوابي او اب ګرمک کلیو کې له سختو نښتو وروسته د غورماچ کمي ته ورسېدلي دي.
په فاریاب کې د ملي اردو ویاند وايي، چې د افغان امنیتي ځواکونو او وسله والو طالبانو تر منځ په نښته کې ۲۰ طالبان وژل شوي، ۸ تنه ټپيان او ۳ امنیتي سرتېري هم ټپيان شوي دي.
دی وايي، د وسله والو طالبانو له خوا د قیصار او غومارچ تړل شوې لویه لار د امنیتي ځواکونو له خوا پرانیستل شوې ده.
طالب اورپکو تېره اونۍ د یکشبې شپې په نیمايي کې پر غورماچ ولسوالۍ ډله ییز برید وکړ او ۱۲ ساعته دغه ولسوالي د دوي په لاس کې وه.
د فاریاب ولایتي شورا رییس سید عبدالباقي هاشمي سلام وطندار ته وویل، چې د غورماچ ولسوالۍ پوستې له ۲ ورځو سختو نښتو وروسته د وسله والو طالبانو لاسته ورغلې.
