غزني ولایت په دې وروستیو کې ډېر ناامنه شوی دی. طالبان هره شپه د امنیتي ځواکونو پر پوستو بریدونه کوي او سربېره په دې په واټونو کې ترور په خلکو ژوند تورتم کړی دی.
د دې ولایت والي وحیدالله کلیمزي سولې ته د رسېدو په مشورتي غونډه کې وویل، غوڅ دریځ لري او ټولو امنیتي بنسټونو ته یې امر کړی دی چې د طالبانو ټول نفوذي عوامل او هغه وګړي چې دغې ډلې ته پيسې راټولوي په نښه کړي.
د غزني د والي په خبره، په دې ولایت کې د طالبانو د جګړې یوه مهمه برخه له ښار او کلیو نه د دې ډلې د نفوذي کسانو د مالي تمویل په مرسته مخې ته ځي.
ښاغلی کلیمزی وايي، هغه کسان دې ووژل شي څوک چې طالبانو ته پیسې راټولوي.
کلیمزي د غزني له قومي مشرانو هم غواړي چې په رښتیني ډول د دولت ملاتړ وکړي او نه باید نمایشي او ریاکارانه عمل.
د غزني امنیه قوماندان فرید مشعل هم وايي چې له خپل ټول ځواک سره هڅه کوي چې د طالبانو د مالي ملاتړو تر څنګ د دې ډلې نفوذي عوامل او هغه کسان چې په ښار کې ترور کوي؛ له هغوی سره قانوني چلند وکړي.
د غزني ولایتي ادارې لهدې مخکې هم د طالبانو او د هغوی ملاتړو د ځپلو په پار ډېرې ژمنې کړي؛ خو تر اوسه پهدې برخه کې عملي ګام نهدی پورته شوی او غزني د هرې ورځې له تېرېدلو سره ناامن کېږي.
