د ټولشموله حکومت ولسمشر عبدالله عبدالله ته نږدې سرچينې سلاموطندار ته وايي چې ټاکل شوې لسو ولايتونو ته ډېر ژر واليان معرفي کړي.
سرچينو د معرفي کېدونکيو کسانو په اړه جزيات نه ورکوي خو وايي چې د تخار د والي مکتوب لېږل شوی او ډېر ژر به خيرمحمد تيمور دا څوکۍ ونيسي.
د سرچينې په وينا، د بدخشان پر څوکۍ هم کار روان دی او ډېر ژر به د بدخشان د اوسني والي ذکريا سودا له لوري د عبدالله عبدالله د ملاتړ او نه ملاتړ له پرېکړې وروسته دوی خپله پرېکړه وروستۍ کړي.
د ولسمشرۍ څوکۍ پر سر د محمد اشرف غني او عبدالله عبدالله ناندرۍ روانې دي او د امريکا د ځانګړي استازي زلمي خليلزاد هڅې هم تر اوسه بېپايلې دي.
محمد اشرف غني او عبدالله عبدالله په بېلابېلو مراسمو کې د لوړې مراسم پرځای کړل. له دې سره اوس مهال دواړو ټيمونو د ناندريو پای ته رسولو لپاره مذاکراتو ته شين څراغ لګولی دی.
د لوړې له مراسمو وړاندې عبدالله عبدالله سرپل، جوزجان او بغلان ولايتونو لپاره واليان معرفي کړل او د پنجشېر والي هم له عبدالله عبدالله خپل ملاتړ اعلان کړی دی.
