.jpg)
د ټاکنیزو شکایتونو د اورېدلو کمېسیون په کابل کې د ولسي جرګې ټولې رایې د «تقلب او پراخو جرمونو» پر بنسټ باطلې اعلان کړې.
د دې کمېسیون ویاند عليرضا روحاني نن په کابل کې یوې خبري غونډې ته وویل چې دا پرېکړه له ډېرو پلټونو وروسته شوېده.
د بایومتریک سېستم د ګټنې پرمهال رازېږېدلې ستونزې، شاوخوا ۳زره شکایتونه او د ستونزو په اړه د تورنو کسانو اعتراف هغه مهم دلایل وو چې د کابل رایې یې باطلې کړې.
د ټاکنو کمېسیون ځېنې مسوولان هم د وظیفوي بېغورۍ له امله له خپلو دندو ګوښه او نقد جریمه شويدي.
د ټاکنو خپلواک کمېسیون د دارالانشا رییس احمدشاه زمانزی، د کابل ولایت د ټاکنو خپلواک کمېسیون رییس اولالرحمان رودوال، د ټاکنو خپلواک کمېسیون د ساحوي عملیاتو رییس زمری قلمیار، د ټاکنو خپلواک کمېسیون د ساحوي عملیاتو مرستیال عبدالعزیز صمیم او د دې کمېسیون د معلوماتي ټکنالوژۍ رییس سیدابراهیم سادات هغه د ګوښه شویو له ډلې دي.
.jpg)
ځېنو ټاکنیزو شکایتونو ته د رسېدنې په پار د ټاکنیزو شکایتونو کمېسیون پرېکړې نهايې شوې نهدي؛ خو تر اوسه لا پهدې اړه د ټاکنو خپلواک کمېسیون پرېکړه نهده معلومه شوې.
د قانون لهمخې، که د یوې ټاکنیزې حوزې د رایو د باطلېدلو او بیاځلي ټاکنو د مودې په اړه د ټاکنو قانون د ۹۴مې مادې په ۵مې فقرې کې راغلي: «په یوه ټاکنیزه حوزه کې د ټاکنو د عادلانهوالي، پټوالي او مستقیموالي د اصولو د زیان موندنې په صورت کې د شکایتونو مرکزي کمېسیون کولی شي د هغې حوزې ټاکنې باطلې اعلان کړي. پهدې صورت کې د ټاکنو خپلواک کمېسیون باید په یوه اوونۍ کې په هماغه حوزه کې بیاځلي ټاکنې وکړي.»
په کابل کې د ولسي جرګې د ۳۳ څوکیو لهپاره ۸۰۴ تنه نوماند وو چې له ۳۳ هغو یې ۱۰ څوکۍ د ښځو لهپاره ځانګړې شوېوې.
