د عامې روغتيا وزير وايي، په افغانستان کې تېرو ۲۴ ساعتونو کې د کرونا وېروس ۱۰ تازه مثبتې پېښې ثبت شوي چې دې سره د ټولو مثبتو پېښو شمېر ۳۴ ته پورته شو.
د ياد وزارت وزیر فېروزالدین فېروز نن په یوې خبري غونډه کې وويل، له يادو ۱۰ تازه پېښو ۲ یې کابل، ۳ مورده یې هرات، ۲ زابل او یوه یوه پېښه هم بلخ، غزني او کندهار ولایتونو کې دي.
د عامې روغتیا وزیر خبرداری ورکوي چې راتلونکيو دوو اوونیو کې به د کرونا ویروس مثبتې پېښې ډېرې شي او له ولسمشرۍ ماڼۍ یې وغوښتل چې هرات ولایت قرنطین کړي.
هغه همدارنګه وویل، چې افغانستان کې په ۲ سفارتونو کې دوه ډیپلوماتان هم په کورونا ویروس اخته شوي او دغو ډیپلوماتانو ویروس له بهره افغانستان ته رالېږدولی دی.
د عامې روغتيا وزير له هېوادوالو وغوښتل چې په خپلو کورونو کې پاتې شي.
نوموړي وويل چې دوه شکمنې پېښې د ولسي جرګې په وکيلانو کې هم پېژندل شوې دي.
فېروز د هوټلونو، پارکونو، د لامبو حوضونو او عمومي حمامونو له خاوندانو وغوښتل چې خپل فعاليتونه وځنډوي.
نوموړي همداراز له ټولو خلکو وغوښتل چې د ويروس د مخنيوي په برخه کې ورسره همکاري وکړي.
