وسله والو طالبانو د خبرداري له امله د غزني په مرکز کې تېره ورځ د (جون په ۶مه) یو شمېر ښوونځي و تړل شول.
د غزني ولایت د یو شمېر ښوونځیو مدیرانو سلام وطندار سره په خبرو کې وویل، چې تېره ورځ د (جون په ۶ مه) یو کس چې ځان یې د طالبانو استازی ګاڼه، د غزني ولایت د ښوونځیو مدیرانو ته یې د ټیلفوني پر کرښه امر وکړ، چې ښوونځي وتړي.
دغه کس د ښوونځیو امرینو ته ویلي دي، چې د غزني ولایت د نوغي کلي د اوسېدونکو د وژنې له امله ۳ ورځې سراسري ماتم اعلان شوی دی او هرو مرو دې ټول ښوونځي و تړل شي.
د غزني ولایت د نجونو د نواباد ښوونځي سرښوونکې حسینه غلامي سلام وطندار ته وویل، چې د طالبانو له خوا یې خبرداری ترلاسه کړی دی او دغه چاره یې د پوهنې له ولایتي مسولینونو سره هم شریکه کړې ده.
غلامي وایي، چې دغه خبرداري زده کوونکي او ښوونکي وېرولي دي او ښايي، چې په راتلونکو ورځو کې به ښوونځي و تړل شي.
دغه مېرمن زیاتوي، د دې وېره هم شته، چې وسله وال طالبان په ښوونځیو برید وکړي.
د غزني ولایت د پوهنې رییس محمد عابد عابد سلام وطندار ته وویل، چې له یو ناڅرګند ادرس نه د ښوونځیو امرینو ته ویل شوي دي، چې د ۲ ورځو لپاره دې ښوونځي وتړل شي.
د عابد په وینا، د دې ستونزې د حل لپاره یې د سیمې له قومي مخورو سره خبرې کړي دي او له دې لارې هڅه کوي، چې د پوهنې درسي بهیر ټکني نه شي.
د پوهنې رییس وايي، چې تېره ورځ د مغلان ښوونځی تړل شوی دی او تېر ماسپښین د یو ساعت لپاره د جهان ملکه ښوونځي هم تړل شوی و.
د زده کوونکو یو شمېر کورنۍ وايي، چې تېره ورځ یو شمېر ښوونځي تړل شوي وو او ځېنې نور یې هم د تړلو په درشل کې دي.
تر دې مهاله طالبانو په دې اړه څه نه دي ویلي.
