د عامې روغتیا وزیر فیروزالدین فیروز نن په کابل کې د شري ناروغۍ واکسین سراسري کمپاین پیلولو په مراسمو کې وویل، ټاکل شوې دغه کمپاین کې له ۹ میاشتني تر ۱۰ کلنۍ پورې ۱۳.۸ میلیون ماشومان واکسین شي.
د ښاغلي فیروز په وینا، پهدې کمپاین ۸.۷ میلیون امریکايي ډالره لګښت راځي چې د واکسین نړۍوال اېتلاف له بودیجې څخه ورکول کېږي.
ښاغلی فیروز وايي، د دغه کمپاین پلي کولو لهپاره ۴۱زره او ۳۵۰ کسانو ته مسلکي زدهکړه ورکړل شوې او د شري ناروغۍ مخنیوي واکسین کمپاین به د ټول هېواد په کچه دوو پړاوونو کې پلی شي.
د عامې روغتیا وزیر په وینا، د شري ناروغۍ واکسین لومړی پړاو د سنبلې له لسمې نېټې تر ۱۹ پورې د لسو ورځو لهپاره او دویم پړاو یې هم د سږ کال عقرب میاشت کې په لاره اچول کېږي.
د وړاندې شویو شمېرو لهمخې، د ۱۳۹۶ کال کې د هېواد روغتیايي مرکزونو کې د شري ناروغۍ ۱۵۳۳۵ پېښې ثبتې شوېدي چې لهدې ډلې ۴۴۳۸ یې بستر شوي او ۶۸ پېښې یې د مړینې دي.
د شري ناروغنۍ د مخنیوي واکسین نه مخکې، د ټولې نړۍ په کچه په کال کې شاوخوا ۲۰ میلیونو ماشومانو پهدې ناروغۍ اخته کېدل او یوازې ۱۹۸۰ میلادي کال کې ۲.۶ میلیونو ماشومانو د شري واکسین نهشتوالي له امله ژوند له لاسه ورکړیدی.
