غور هغه ولایت دی، چې پخوا پهکې هیڅ ښځينه څارنوالانې نه وې، خو اوس د لومړي ځل لهپاره یوې مېرمنې په دغه ولایت کې دنده پېل کړه.
او دغه څارنوالۍ وروسته له هغه کار پېل کړ، چې سلاموطندار په غور ولایت کې د ښځینه څارنوالانو د نشتوالي په اړه راپور چمتو کړ.
عبیده شرر لومړۍ میرمن ده، چې په دغه ولایت کې د لویې څارنوالۍ له خوا له ښځو سره د تاوتریخوالي د مخنیوي په موخه ددغه ولایت استیناف څارنوالې په توګه وګومارل شوه.
میرمن شرر چې د کابل پوهنتون د حقوقو پوهنځۍ د قضا برخه کې یې زدهکړې کړي ژمنه وکړه، چې عدالت ته د میرمنو لاسرسي او له ښځو سره د تاوتریخوالي دله منځه وړلو په برخه کې به جدي هڅې وکړي.
د غور د استیناف څارنوالۍ رییس عبدالمعروف فایق وویل، چې دوی پخوا له زیاتو ستونزو سره مخ و او د ښځو دوسیې د نارینه څارنوالانو له خوا څیړل کیدې، خو اوس به د څارنوالې په توګه د یوې میرمنې ګومارنه دغه ستونزه حل کړي.
دغه راز، د غور یو شمیر ښځینه مدني فعالانو هم له ښځو سره د تاوتریخوالي مخنیوې څارنوالې په توګه د عبیدې شرر ګومارنه وستایله.
د غور دوه تنه مدني فعالانې شهلا او فریده ناصري سلام وطندار ته وویل، چې مخې لهدې عدلي او قضايي بنسټونو کې د ښځینه وو ستونزې زیاتې وې، ځکه د دوی پر خبره، کله چې یوه میرمن وهل کیږي نشي کولی چې دا قضیه یو نارینه څارنوال ته شرح کړي.
دوی هیله ښي، چې وروسته لهدې باید د ښځینهو ستونزې حل شي.
میرمن عبیده شرر غور ولایت کې له ښځو سره د تاوتریخوالي مخنیوي په برخه کې داسې مهال خپل کار پیلوي، چې په وروستیو کلونو کې دغه ولایت کې له ښځینه وو سره د تاوتریخوالي زیاتره پیښې لکه د رخشانې سنګساریدل، د عزیز ګل وژل او په لسګونه نورو پیښو شاهد وو.
