د سیاسي ګوندونو کور او مدني ټولنو بنستونو د پنجشنبې پر ورځ کابل کې خبري غونډې ته وویل، چې په ټاکنیزو کمېسیونونو کې د بېپرې کسانو ګومارنه د حکومت له خوا خلکو ته فریب ورکول دي.
د سیاسي ګوندونو غړی نصرالله فلک نوي کمېشنران له پخوانیو هغو بتر بولي او په دې اند دی چې په دغو کمېسیونونو کې د بې پرې کسانو ګومارنه ګټه نه لري.
فلک زیاتوي، بې پرې، مسولیت منونکي او ځواب ویونکي کسان د دوی په کارونو کې نشته .
خو د ټاکنو یو شمېر څارونکي بنسټونه بیا وايي، چې د ټاکنیزو بنسټونو د نویو کمیشنرانو هرکلی کوي.
د نوي خط د سازمان رېیس فهیم صدیقي په دې غونډه کې وویل، چې د ټاکنو نوي غړي له پخوانیو ټاکنو څخه په ګټې اخیستنې سره خپلواکي او بې پریتوب دې په عمل کې ثابته کړي.
دوه ورځې مخکې ولسمشر محمد اشرف غني ۷ کسان د ټاکنو خپلواک کمېسیون او ۵ نور يې د شکایاتو اورېدو کمېسیون ته ور وپيژندل.
