په بامیان ولایت کې زرګونو ولسي خلکو د کابل بامیانو د لویې لارې په اوږدو کې د ناامنیو، انسان تښتولو او یرغمل نیولو د اعتراض په دود لاریون وکړ.
دغو اعتراض کوونکو شکایت کاوه، چې له یوې میاشتې راهیسې د مرکزي ولایتونو په ځانګړي ډول د بامیانو ولایت شاوخوا ۳۰ تنه ولسي خلک د پروان ولایت د غوربند په دره کې تښتول شوي دي او حکومت د دغې لویې لارې امنیت خوندي کولو ته پام نه کوي.
د تېر کال د کب میاشتې په څلورمه ڼېته د ۳۱ مسافرو له تښتولو را وروسته چې د داعش ډلې له لوري وتښتول شول د هېوا د لویو لارو په بېلا بېل برخو کې د ناپېژاندو وسله والو ډلو له خوا د انسان تښتولو پېښې زیاتې شوې.
دغو اعتراض کوونکو شعار ورکاوه، چې "امنیت زموږ حق دی" او حکومت باید د بامیانو او کابل لویه لار چې د میدان وردګو او پروان ولایتونو نه تېره شوې ده؛ امنیت یې خوندي کړي.
د بامیان خلکو د دغه ولایت له سیمه ییز او مرکزي حکومتونو وغوښتل، چې بامیانو ولایت ته د ورغځېدلو لویو لارو امنیت خوندي کړي.
صمدعلي د بامیانو ولایت دوکاندار دی. نوموړی وايي، چې د تېرې سه شنبې په ورځ یې تره او د تره زوی یې د پروان سیاګرد په ولسوالۍ کې تښتول شوي دي.
صمدعلي وايي، چې د دوی له تښتولو وروسته تښتوونکو د دوی د کورنۍ سره اړیکه نیولې ده او د دوی د خلاصون په بدل کې ۳۰۰ زره ډالرو غوښتنه کوي.
د راپورونو پربنسټ شاوخوا شپږ میاشتې مخکې وسله والو کسانو د بامیان د شېبر ولسوالۍ څلورتنه تښتولي وو، چې د ۸۰ زره امریکايي ډالرو په بدل کې یې خوشې کړل.
د بامیان ولایت د دیني عالمانو د شورا رییس سجاد محسني د دغه ولایت له سیمه ییزو امنیتي ادارو څخه شکایت کوي او دوی د خلکو د امنیت د خونديتوب په برخه کې په ناغېړۍ تورن وي.
