د افغانستان د بشر حقونو کمېسیون مشره سیما سمر وايي، چې افغان حکومت د سولې خبرو په څلور اړخیزه غونډه کې د ښځو ګډون او د سولې په اړه د دوی طرحه په پام کې نه وه نیول شوې.
مېرمن سمر په یوې غونډه کې وویل، د سولې په اړه هغه پالیسې چې د مېرمنو نظر په کې په پام کې ونه نیول شي، ناقص دی.
د سولې خبرو اترو په تړاو د څلور اړخیزې ناستې دویمه غونډه نن ( دوشنبه د جنوري میاشتې په ۱۸مه) کابل کې جوړه شوه؛ په دې غونډه کې د افغان دولت او د دولت ټولو مخالفو وسله والو ډلو تر منځ د پایښت لرونکې سولې ته د رسېدو په اړه د یوې نقشې پر جوړولو خبرې اترې وشوې.
سمر په خپلو خبرو کې وویل، چې د سولې په خبرو کې باید د جګړې قربانیان او عدالت په پام کې ونیول شي، تر څو دغه خبرې اترې د ټول ملت قناعت تر لاسه کړي.
د دغې غونډې ګډونوال وايي، چې افغان حکومت باید د سولې په خبرو کې د سیمې هېوادونه هم ور ګډ کړي، تر څو د سولې خبرې لا عملي جنبه پیدا کړي.
په ورته وخت کې په بلخ ولایت کې ځېنې ښځو په یوې جوړې شوې غونډه کې په دې اندېښنه ښکاره کړه، چې د سولې په خبرو کې د ښځو ګډون او ونډه په پام کې نه ده نیول شوې.
دغو مېرمنو د ښځو حقونو له مدافعو بنسټونو وغوښتل، چې پر تقنیني بنسټونو دې فشار راوړي تر څو پر ښځو د تاوتریخوالي د مخنیوي قانون تصویب شي.
د بلخ ولایت مدني فعالانې له حکومت څخه غواړي، چې له طالبانو سره د سولې په خبرو کې لاسته راوړنې او په دغې پروسه کې د ښځو ونډه له پامه ونه باسي.
د بلخ د سولې ولایتي کمېټې غړې محبوبه سادات وايي، چې د هېواد په کچه په لویو پرېکړو کې د ښځو ونډه تل نمایشي وي.
دوی د سولې په پروسه کې د ښځو ګډون لوی خنډ افراطیت او وهابیت بولي او له دینې عالمانو غواړي، چې په ټولنه کې د ښځو خلاف د افراطیت مخنیوي وکړي.
د دغه ولایت یو دیني عالم سید محمد اسلامي وايي، چې د ښځو د ګډون په برخه کې لوی خنډ افراطیت او وهابیت دی، چې د دغو فرقو ملاتړ د پاکستان او عربستان هېوادونو له خوا کېږي.
