د سولې عالي شورا چارواکي وايي، هېواد کې د سولې راوستو برخه کې د ښځو رول مهم دی او باید بنسټیز شي.
د سولې عالي شورا مرستیالې حبیبې سرابي نن کابل کې د «سولې میندې پروګرام» دویم پړاو، لومړۍ غونډې کې وویل، سولې ته د رسېدو لهپاره باید ښځو ته بنسټیز رول ورکړل شي.
د نوموړې په وینا، ښځې غواړي په هېواد کې د سولې په اړه رښتینی او بنسټیز بدلون راولي.
سرابي زیاتوي، د «سولې مېرمنو» هدف هېواد کې د سولې ټینګښت دی او هڅه کوي چې دا پروسه له کورنیو راپیل کړي.
په همدې حال کې د دې پروګرام ګډونواله لېمه د هېواد پرمختګ له سولې سره تړلی بولي او وايي، سوله د رڼا او ارامۍ لامل کېږي.
د یادونې ده چې د «سولې میندو» پروګرام لومړی پړاو په کندهار، غور او پروان ولایتونو کې جوړ شو او دویم پړاو یې په کندوز، بغلان، لغمان، جوزجان، کاپیسا او هرات ولایتونو کې جوړېږي.
بلخوا د ښځوچارو وزیرې دلبر نظري په کابل کې یوې بلې غونډې کې نیوکه کړې چې په حکومتي کچه سترو پرېکړو کې د ښځو ونډه کمرنګه ده.
نوموړې د حکومتي په مهمو برخو کې د ښځو ونډه سمبولیکه ګڼي او تینګار کوي چې لا هم په هېواد کې د ښځو ظرفیت او وړتیاوو ته د شک په سترګه کتل کېږي.
