د سولې عالي شورا چارواکي وايي، د سولې ټینګښت لپاره د سولې عالي شورا د ستراتېژۍ پر غني کېدو کار روان دی او ډېر ژر به بشپړه شي.
د سولې په اړه د سیمهییزې اجماع برخه کې د ولسمشر سلاکار او د سولې عالي شورا د دارالنشا رییس محمدعمر داودزی وايي، د سولې مشورتي بورډ واکونه به مشورتي نه، بلکې تصمیم نیوونکي وي او د حکومت د سولې مرکچي پلاوی به ورته مسوول وي.
عمر داودزي د افغان سولې په اړه د امریکا د ځانګړي استازي زلمي خلیلزاد هڅې وستایلې او ټینګار یې وکړ چې افغان حکومت به هم ډېر ژر په مستقیمه توګه په یادې پروسې کې شامل او له طالبانو سره د سولې خبرو اترو مسایل به پر مخ بوځي.
نوموړي زیاته کړه، په پام کې لري چې راتلونکې اوونۍ پاکستان او وروسته بیا د سیمې نورو هېوادونو ته هم سفر وکړي.
په همدې حال کې ولسي جرګې د چهارشنبې ورځې په عمومي غونډه کې د افغان سولې په اړه یوه خبرپاڼه خپره کړه. په خبرپاڼه کې لیکل شوي چې د افغان سولې پروسې مالکیت د افغان حکومت دی او پر طالبانو یې غږ کړی چې تر کوم قید او شرط پرته له حکومت سره د سولې مېز ته کېني.
په خبرپاڼه کې امریکا ته په خطاب لیکل شوي چې د افغان سولې په اړه ټولې خبرې اترې باید د افغان حکومت د استازیو په ګډون ترسره شي.
د ولسي جرګې دویم مرستیال امیرخان یار چې د غونډې مشري یې هم کوله پر افغانانو او نړېوالو غږ وکړ چې د ولسي جرګې د خبرپاڼې ملاتړ وکړي.
بلهخوا د مدني ټولنو استازي وايي، د افغان سولې پروسه باید یوازې د افغان حکومت له لوري پر مخ لاړه شي او دغه راز باید د تېرو کلونو لاستهراوړنې هم پهکې قرباني نهشي.
دا په داسې حال کې ده چې په دې وروستیو کې د افغان سولې په اړه د هېواد، سیمې او نړۍ په کچه د پام وړ پرمختګ شوی او ټاکل شوې په روانه میلادي میاشتې کې د افغان سولې په اړه د امریکا، پاکستان، متحده عربي اماراتو، سعودي عربستان او د طالبانو د استازیو تر منځ د سعودي په جدې ښار کې غونډه جوړه شي.
