د سوداګرۍ وزارت چارواکي وايي، چې په ۲۴ ساعتونو کې هېواد ته په کافي اندازه د سون توکي وارد شوي دي او بیې به یې راکمې شي.
د یاد وزارت ویاند مسافر قوقندي سلام وطندرا ته وویل، چې په تېرو څو ورځو کې د حیرتان بندر له لارې د نورو سوداکریزو توکو د واردلو له امله د سون توکو د واګونو راوړل ځنډول شوي او د بیو د لوړوالي لامل شوي وو.
دی وايي، چې اوس د سون توکو د واردولو نوبت رارسېدلی دی او ډېر ژر به د سون توکو بیې راکمې شي.
د قوقندي پر خبره، د افغانستان وارداتي هېواد دی، یو کوچنی بدلون هم کولای شي، چې د هېواد پر بازار خپل اغېز وکړي.
نوموړي وايي، په بازار کې د عمده پلورونکو له خوا د سون توکو بیې نه دې لوړې شوي، بلکې په بازار کې د سون توکو د حجم کموالی او پرچون پلورونکو له خوا د اخیستلو ناتواني د دې لامل شوې، چې د سون توکو بیې لوړې شي.
د سوداګرۍ وزارت ویاند وايي، چې حکومت د سون توکو کافي ذخیره لري او د اړتیا په صورت کې کولای شي، چې د ۳ میاشتې لپاره یې بازار ته عرضه کړي.
له دې مخکې د کابل ښار یو شمېر اوسېدونکو د سون توکو د بیو له زیاتوالي نه شکایت کړی و.
اوس وخت کې د کابل ښار په بازارونو کې یوه کیلو ګاز په ۵۰ افغانۍ پلورل کېږي او د تېرې اونۍ په نسبت یې په بیه کې ۲۰ افغانۍ زیاتوالی راغلی دی.
د کابل ښار یو شمېر اوسېدونکي وايي، چې د کار نشتوالي او د خراب اقتصادي حالت له امله د ګازو اخیستلو وس نه لري.
دوی وايي، چې د سون توکو د بیو زیاتوالی یې پر ژوند اغېز کړی او خلک له حکومت نه غواړي، چې د سون توکو بیې کنترول شي.
افغانستان د سون توکو د ۵ لویو حوزو په لرلو او په نړۍ کې د نفت لرونکو هېوادونو په ډله کې پنځلسم ځای لري، خو لا هم د کال ۳،۵ میلیونه لیتره تېل او ۲۵۰ زره متره مکعب د اړتیا وړ ګاز له نورو هېوادونو نه وارده وي.
