د حزب اسلامي د مرکچي پلاوي مشر امین کریم سلام وطندار ته وویل، د دوی ملګري د امنیتي همکاری له پاره مرکز ته راغوښتل شوي وو، خو په امنیتې ادارو کې د ځینو کړیو له خوا چې نه غواړي د سولې خبرې بریالۍ شي؛ د مرکچي پلاوي غړي یې په خپلو ولایتونو او نور هغه یې په لارو کې نیولي دي.
کریم امین په خبرو کې وویل، چې د حزب اسلامي شاوخوا ۶۰ غړو نیول کېدل به هېڅکله د افغان دولت او حزب اسلامي ترمنځ د سولې په لاسلیک شوې هوکړې منفي اغیز ونه کړي.
دی وايي، د حزب مشرتابه پوهېږي، چې دا د سولې مخالفو کړیو کار دی او دوی به پرې نږدي، چې د دغو کړیو ناسم ارمانونه پوره شي.
د موضوع په تړاو مو هڅه وکړه، د کورنیو چارو وزارت غبرګون ولرو؛ ځواب مو ترلاسه نه کړ.
دغه راز د حکومت او حزب اسلامي ترمنځ د هوکړه لیک د پلي کېدو کمېسیون مشر اکرم خپلواک هم د تیلیفون په کرښه په دې اړه له خبرو کولو ډډه وکړه.
