د ولسي جرګې غړیو نن د دې جرګې په غونډه کې د سوداګرۍ او صنایعو وزارت د بودیجې ځنډولو ترڅنګ، د دغه وزارت د سرپرست اجمل احمدي په لاسلیک ګومارنې او قراردادونه بېباوره وبلل.
د ولسي جرګې د دغه ګام لامل، د ولسي جرګې غونډې ته د سوداګرۍ او صنایعو وزارت د سرپرست اجمل احمدي نه ورتګ او په اړه یې بېغوري یاده شوې ده.
د ولسي جرګې رییس میررحمان رحماني وايي، دغې جرګې له پنځو میاشتو راهیسې څو ځله اجمل احمدي استجواب کړی، خو هغه د جرګې غونډو ته نه دی ورغلی.
د جرګې په نننۍ مصوبه کې له حکومتي ادارو غوښتل شوي چې د اجمل احمدي لاسلیک ونه مني.
موږ وغوښتل چې د ولسي جرګې د دغې پرېکړې په تړاو د اجمل احمدي نظر هم واخلو، خو د سوداګرۍ او صنایعو وزارت ویاند او مرستیال په دې اړه له سلاموطندار سره له خبرو کولو ډډه وکړه.
اړوند مطالب:
د ټرانسپورټ وزارت د سړک د ټرانسپورټ رییس لویې څارنوالي ته ور وپېژندل شو
