د عامې روغتیا وزارت د رواني ناروغۍ په برخه کې دوه ورځنی سمپوزیم جوړ کړیدی.
دې سمپوزیم ته د عامې روغتیا معین فدامحمد پیکان وویل، د ټول هېواد په کچه په رواني ناروغیو د اخته کسانو شمېر لوړ ده او د روانی ناروغیو په اړه شوې سروې ښيي چې یوه میاشت کې ۴۰ سلنه کسانو رواني فشارونه لېدلي دي.
ښاغلی پیکان وايي، سره لهدې چې دې برخې کې د دوی مالي امکانات بسنه نهکوي؛ خو بیا هم هڅه کوي د یو شمېر نړۍوالو موسسو په مرسته ښه خدمات وړاندې کړي.
د هغه په وینا، رواني برخه کې تر ډیره لګښت په سلاکارانو شوی او اوس شاوخوا ۷۵۰ رواني سلاکاران او د هېواد په کچه هر ولایتي روغتون کې دوه روزل شوي مسلکی کارکوونکي موجود دي.
دا داسې مهال دی چې لهدې مخکې سروې ښودلې وه چې تېرو کلونو کې د رواني ناروغۍ کچه ان تر ۶۰ سلنې رسېدله.
په همدې حال کې د عامې روغتیا وزارت ویاند وحیدالله مایار جګړه، بېوزلي او ځېنې نور موارد د رواني ناروغیو مهم لاملونه بولي.
نوموړی وايي، شته امکاناتو ته په پام د عامې روغتیا وزارت د رواني ناروغیو په برخه کې کار کړی چې په وینا یې، یو لړ لاسته راوړنې هم لري. د ده په خبره، رواني خدمات په اساسي هغو کې شامل شوي او هڅه کوي چې دا خدمات نور هم پراخ کړي.
د عامې روغتیا وزارت د چارواکیو په باور، دا لومړی ځل دی چې د رواني صحت په برخه کې ملي سمپوزیم جوړېږي چې د روغتیا برخې نړۍوال او ملي مسوولان پهکې د ستونزو او حللارو په اړه بحث او خبرېاترې کوي.
ورته مطالب:
هېواد کې له هرو دوو کسانو نه یو یې رواني ناروغ دی
