د ولسي جرګې نننۍ عمومي غونډې ته د سیمهییزو ارګانونو خپلواکې ادارې د پالیسي معین تیمورشاران د کاغذي تذکرو په وېش کې د یاد بنسټ رول په اړه د ځواب ویلو په موخه وربلل شویو.
ځېنو وکیلانو وویل، سیمهییز چارواکي د تذکرو په وېش کې سلیقوي چلند کوي او په ډېرو ولایتونو کې والیان او ولسوالان د تذکرو په وېش کې ګوتې وهي.
دوه وکیلان فوزیه کوفي او محمدحسین فهیمي وايي، د ځېنو ولایتونو اوسېدونکي له تذکرو پاتې دي او ځېنو نورو کې له اړتیا زیاتې تذکرې وېشل شوېدي.
د فهیمي په وینا، په سرپل ولایت کې تذکرې غیرعادلانه وېشل شوي. د ده په خبره، له ټولو۶۷ زرو تذکرو نه ۲۶ زره او۹۹۵ هغه وېشل شوېدي.
د سیمهییزو ارګانونو خپلواکې ادارې د پالیسي معین تیمورشاران د کاغذي تذکرو په وېش کې د زورواکانو او سیمهییزو چارواکیو لاسوهنه مني او ټینګار کوي چې د وطنوالو شکایتونو د څېړنې په موخه میکانیزم جوړېږي چې د لاسوهنو مخه ونیول شي.
ښاغلی شاران زیاتوي، تراوسه د ټول هېواد په کچه ۱میلیون، ۹۶۰ زره او ۵۶۰ تذکرې وېشل شوېدي.
د سیمهییزو ارګانونو ادارې معین په وینا، د تذکرو د وېش بهیر په ۱۶ ولایتونو کې په عادي بڼه روان دی؛ خو په ۹ ولایتونو کې له ستونزو سره مخ دی.
د ولسي جرګې لومړي نایب همایون همایون چې د نننۍ غونډې مشري یې کوله ویلي، د سیمهییزو ارګانونو اداره دې د سیمهییزو چارواکیو لاسوهنې مخه په کلکه ونیسي چې د ولسي جرګې او ولسوالیو شوراګانو ټاکنې په شفافه توګه ترسره شي.
