ځينو مدني فعالانو په کابل ښار کې د تېرې پنجشنبې برید شهیدانو له پاره د عدالت غوښتلو په موخه د تحصن خيمه ووهله.
دوی وايي، چې حکومت باید د مکافاتو او مجازاتو اصل په ټینګه رعایت کړي او په امنیتي سکټورونو کې دې د شایسته سالارۍ له مخې ګومارنې په جدي ډول په پام کې ونیول شي.
دغو فعالانو همدارنګه له حکومتي چارواکو په جدي ډول غوښتنه وکړه، چې د امنیت په برخه دې د هر ډول ناغېړیو مخه ونیسي.
د دغو فعالانو له ډلې یو تن سمیع دره يي وايي، چې د افغانستان د قوانینو پر بنسټ حکومت مکلف دی، چې د هېوادوالو د ښه ژوند او امنیت برابرولو په برخه کې اسانتیاوې رامنځ ته او جدي هلې ځلې وکړي.
دره يي وايي، چې حکومت باید د شهیدانو کورنيو ته ځواب ویوونکی وي.
همدارنګه یو بل فعال ذبیح الله شادان وايي، چې حکومت باید پرته له هر ډول ځنډ څخه هغه امنیتي چارواکي، چې د هېوادوالو د امنیت په برخه کې يې ناغيړي کړې پېدا او عدلي او قضايي ارګانونو ته يې معرفي کړي.
ذبیح الله وايي، چې نه باید د دوی رتبو او جګو مقامانو سره لحاظ وشي.
هغه زیاتوي، چې حکومت باید د شهیدانو له کورنۍ سره ژر تر ژره مرسته وکړي او د هر شهید د کورنۍ یو غړی په دنده و ګوماري.
د شهیدانو کورنۍ هم حکومت تورنوي، چې دوی ته يې جدي پام نه دی کړی او تل يې د دوی د امنیت ټينګښت په برخه ناغیړي کړې.
دوی وايي، چې د خپل کورنۍ ګټيالي یې له لاسه ورکړي او حکومت باید له دوی سره مرسته وکړي.
په همدې حال کې دغه مدني فعالان له حکومته غواړي، چې دوی د پېښې د څېړلو په کمېسیون کې هم شامل کړي، ترڅو پر حکومت د خلکو د بې باورۍ کچه راکمه شي.
دا په داسې حال کې ده، چې تېره پنجشنبه د کابل ښار په څنډه د کمپنۍ په سیمه کې د پولیسو د اکاډمۍ پر کاروان بریدونه وشول، چې د څو دقیقو په توپیر سره د دوو چاودنو له امله لسګونه پولیس سرتیري او عام خلک ووژل شول او ګڼ شمیر نور یې ټپیان کړل.
له هغه وروسته د ارګ له لوري اعلامیه خپره شوه، چې د میدان وردګ پولیسو تعلیمي مرکز د فارغانو د کاروان پر بسونو د ځانمرګي برید په هکله د څېړنو موظف پلاوي د موندونو راپور اوريدو وروسته ولسمشر پريکړه وکړه، چې د اداري معینیت دفتر رییس او د جلب او جذب عمومي قوماندانۍ سرپرست مل پاسوال محمد حسن عالمي، د جلب او جذب عمومي قوماندانۍ رییس ارکان مل پاسوال عبدالمجید صادقي، د تعلیم او تربیې عمومي قوماندان پاسوال الهام وردک، د تعلیم او تربیې قوماندانۍ مرستیال مل پاسوال سردار محمد کوهدامني، د میدان وردک پولیسو تربیوي مرکز قوماندان مل پاسوال جلال الدین رګبار دندې باید و ځنډول شي او همدارنګه کورنیو چارو وزارت ته لارښوونه وشوه، د پنځو تنو نورو ټیټ رتبه کارکوونکو دندې چې د میدان وردک پولیسو تعلیمي مرکز فارغانو د امنیت د تامین او تصمیم نیولو مسوولیت یې درلود تعلیق شي.
