د ماليې وزارت د ۲۵۰ میليونو ډالرو په ارزښت له نړېوال بانک سره یو تړون لاسلیک کړ، چې د تړون له مخې به د دغو پېسو پر یوه برخه د هندوکش په اوږدو کې د بامیان ـ دوشي لاره جوړه شي.
همدارنګه په تړون کې دا هم ویل شوي، چې د یادو پېسو يوه اندازه به د سالنګونو د بیا رغونې په برخو کې هم ولګول شي.
د ماليې وزیر اکلیل حکيمي نن شنبه (نومبر۱۴مه) د دغه تړون د لاسلیک کولو پر مهال وویل، چې د دغه تړون پېسې بلاعوض دي، چې د نړېوال بانک له لوري افغان حکومت په واک کې ورکول کيږي.
نوموړي زیاته کړه، چې د حکومت یو له پالیسو دا دی، چې افغانستان د مرکزي اسیا او سویلي اسیا ترمنځ په یو ارتباطي پل بدل شي او څنګه و کولی شي د سوداګرو له پاره د ترانزیت په برخه کې اسانتياوې رامنځ ته کړي.
د ماليې وزیر وویل، چې د دغو پېسو تدارکاتي پروسيجر به په ډېر شفاف ډول طی مراحل شي.
د ټولګټو وزیر محمود بلیغ وايي، چې د دوشي ـ بامیان لارې او د سالنګ تونلونو بیا رغولو چارې به په ۲۰۱۶ م ز کال کې پېل شي او تر ۲۰۱۹ م ز کال کې به پای ته ورسيږي.
نوموړي له دې وړاندې هم بامیان ته د خپل سفر پر مهال په راتلونکي ميلادي کال کې د دغې لارې جوړولو په اړه خبر ورکړی و.
هغه زیاته کړه، چې د دوشي ـ بامیان لاره ۱۵۲ کیلو مترو او سالنګونه به ۸۶ کیلو مترو په اوږدو کې جوړه شي.
د نوموړي په وینا، د شمال لارې او د سالنګ تونلونو جوړول به د جبل السراج څخه پېل او د خنجان تر ولسوالۍ پورې دوام وکړي.
هغه وویل، چې دغه طرحه د هغو طرحو په ډله کې شمېرل کيږي، چې د افغانستان شمالي ولايتونه له سویل او مرکز سره نښلوي.
په افغانستان کې د نړېوال بانک رییس باب سام وايي، چې د خلکو اقتصادي وضعیت ښه کېدا د سړکونو په جوړولو پورې مستقیمه اړیکه لري.
هغه هیله وښوده، چې د دغو دوو لارو په جوړولو سره به د خلکو په اقتصادي ژوند کې مثبت اغیز راشي او د افغانستان د ښاري تړښت زمينه به برابره کړي.
محمود بلیغ وايي، چې نړېوال بانک او د ټولګټو وزارت د دغو لارو د جوړولو سم انسجام په موخه یوه فني ډله جوړه کړې.
یاده دې وي، چې تر اوسه د دوشي ـ بامیان په اړه ۲۳،۷ کیلو متر سړک استملاک شوی او د منظوري له پاره د افغانستان کابينې ته استول شوی دی.
