د درملو د تولید د کورنیو فابریکو او روغتیا سکټور د ملاتړ په موخه په افغانستان کې د درمل جوړولو ملي صنعت اوونۍ نن په کابل کې ونمانځل شوه.
د درملو صنعت او روغتیایي محصولاتو تولیدوونکیو ټولنې رییس احمدسعید شمس وویل، پهدې وروستیو درې کلونو کې د پخوا په پرتله د درملو صنعت دوه برابره وده کړې ده.
د نوموړي په وینا، دغه صنعت ته د حکومت پام او د څو ډوله درملو د واردولو مخنیوی د یاد صنعت د ودې لامل شوي دي.
د شمس په وینا، اوس له ۱۸ سلنه ډېر درمل په کور دننه تولیدېږي.
په همدې حال کې د عامې روغتیا وزیر فېروزالدین فېروز وايي، د مناسبو پورونو نشتوالي، د خامو موادو واردولو لوړ لګښت، د برېښنا کموالی، د ماهرو کارګرانو تشه او ځینو نورو ستونزو له امله د ګاونډيو هېوادونو په پرتله د درملو تولید ګران تمامېږي.
د عامې روغتیا وزیر زیاتوي، له یادو ننګونو سره سره خصوصي سکټور او د درملو صنعت تولیدوونکیو ټولنه د عامې روغتیا ورزات په همکارۍ توانېدلې چې په تېرو ۳ کلنو کې ۶۰ فابریکې جوړې کړي.
د عامې روغتیا وزارت د چارواکیو د مالوماتو له مخې، د درملو له پلوه د هېواد کلنی لګښت شاوخوا ۶۰۰ میلیونه ډالره دی.
