په هلمند کې د داعش ډلې مشر ملا عبدالروف ووژل شو
ددې ولایت امینه قوماندان تورن جنرال نبي جان ملا خیل نن دوشنبه ( دسلواغې ۲۰) خبریالانو ته وویل چې خادم د ايساف ځواکونو په یو هوايي برید کې وژل شوی دی.
سرچينه وايي په دغه برید کې د خادم ۶ ملګري هم وژل شوي دي، چې وژل شويو کې یې یو اوښی( دمیرمنې ورور) هم شامل دی.
ځايي امنیتي سرچینو سلام وطندار ته ویلي په وژل شويو کې ۳ هغه یې وزیرستاني وسله وال دي.
په هلمند کې دملي امنیت یوې سرچینې زمونږ سیمیز خبریال ته دنوم پټ ساتلو په شرط ويلي چې په دې برید کې د داعش وسله والې ډلې قوماندان ملا عبدالروف خادم هم وژل شوی دی.
یوه اونۍ وړاندې خبر ورکړل شوی و چې د ملا خادم او طالب قوماندانو ترمنځ د اختلاف له کبله طالبانو ملا روف د ۴۰ ملګرو سره یو ځای ژوندی نیولی و؛ خو طالبانو بیا ددې خبر رد یا تایېد ونه کړ.
ملا عبدالروف خادم سلفي مذهبی تندلاری و چې په ورستيو کلونو کې طالب مشرانو دخپلو وسله والو په منځ کې په دنده وګماره.
دملا عبدالروف خادم په ګمارنه کې د وسله والو طالبانو موخه د مذهبي اختلافاتو په اړه پراخ نظري ښودل و.
خو تر یو کال وروسته ملا عبدالروف خادم او وسله وال طالبان سره مخالف شول او سیمه کې د سختو کړنو پر سر یې له دندې ګوښه کړ.
جاوید کوهستاني سلام وطندار ته ویلي چې ملا عبدالروف خادم د غچ اخیستو له پاره سیمه کې ځان د داعش وسله والې ډلې قوماندان ونوموه.
ملا عبدالروف خادم په ورستيو کې سیمه کې د زیاتو پېسو په ورکولوسره د وسله والو تند لارو مخه ځانته راواړوله.
وروسته بیا د بېلا بېلو تندلارو ډلو له لورې د اسلامي دولت وسله والې ډلې له مشرابو بکرالبغدادي سره بیعت وکړ؛ حافظ خان سعید اورکزی د خراسان امیر او ملا عبدالروف خادم یې مرستیال وټاکل شول، چې بیا وروسته دا خبرونه د اسلامي دولت استازو هم تایېد کړل.
خو دافغانستان ملي امنیت او دهلمند مرستیال والي دا ډله د مخ پټو طالبانو په نوم پيژندله او داعش سره یې د دوي اړېکې رد کولې.
دهلمند ولایت امنیه قوماندان زیاته کړه چې په راتلونکو دوه میاشتو کې به امنیتي حالت ښه کړي .
سرچینه خبر ورکوي چې ددې ولایت په شمالي نا امنه ولسواليو کې یې د سختو او پراخه عملیاتو چمتوالی نیولی دی.
د ملا عبدالروف خادم وژنې په اړه تر اوسه کومې وسله والې ډلې رسنیو ته څه نه دي ویلي
