سر له سبا یکشنبې ورځې تر درېیو میاشتو له لسو د زیاتو کسانو راټولېدل منع کېږي. د ولسمشر د دویم مرستیال سرور دانش دفتر ویلي، د کورونا ویروس له کبله رامنځ ته شوي ترینګلي وضعیت کې د کسبوکار تنظیم طرحه وروستۍ شوې او له یکشنبې ورځې د جوزا له ۱۸مې وروسته هېواد کې پلي کېږي.
د دغې طرحې د اجرا لومړۍ مرحله کې چې د درېیو میاشتو لپاره په پام کې نیول شوې، له لسو د زیاتو کسانو راټولېدل منع کېږي.
د طرحې پربنسټ، عمومي ځایونو کې د ماسک اچول، د دوو مټرو واټن رعایت کول، کور نه د ډېر عمر لرونکو کسانو په وتو بندیز، د کاري چاپېریال ضد عفوني کول، خپلو کارکوونکيو ته د ادارو له لوري د روغتيايي وسایلو چمتو کول او دولتي ادارو کې د کاري ساعتونو رعایت، الزامي شوي دي.
همداراز تر راتلونکيو درېیو میاشتو ټول دولتي او خصوصي ښوونيز مرکزونه په حضوري ډول بند دي، خو کولی شي په انلاین بڼه فعالیت وکړي.
د ولسمشر د دویم مرستیال دفتر وايي، د ودونو هوټلونه، سپورټي او تفریحي ځایونه هم تړلي پاتې کیېږي او د فاتحې او نورو فرهنګي او ټولنیزو مراسمو ترسره کول هم منع شوي دي.
