د حبیب بانک خلاف ښه لوبېدلو د ۵ افغان لوبغاړو بخت راویښ کړ

افغان لوبډله د پاکستان حبیب بانک کرکټ لوبډلې پر خلاف له ښه ځلېدلو وروسته جاوېد احمدي، عمران جنت، عبدالله عادل، ناصرجمال او احسان الله جنت د اروپا سفر له پاره غوره شول.

د افغانستان کرکټ بورډ عمومي مشر نسیم الله دانش یادو لوبغاړیو ته د افغانستان کرکټ بورډ د ټاکونکې ډلګۍ له خوا له اعلان وړاندې دغه زېری ورکړی دی.

د ښاغلي دانش پر وینا، افغان کرکټ بورډ د استعداد لرونکیو ځوانانو غوړېدلو ته ژمن دی او دې ته دوامداره کار کوي.

د کرکټ بورډ عمومي مشر زیاته کړه، جاوېد احمدي به د اروپا په سفر کی د سکاټلنډ او ایرلنډ پر خلاف په پنځوس اوریزو سیالیو کې، احسان الله جنت او ناصرجمال احمدزی به د هالنډ پر خلاف په ۴ ورځنۍ (انټرکانټېنېنټل جام) سیالۍ کې د ملي لوبډلې غړي وي.

نسیم الله دانش همداراز وویل، درېواړو لوبغاړیو، جاوېد احمدي، احسان الله جنت او ناصرجمال احمدزي د پاکستان حبیب بانک کرکټ لوبډلې پر خلاف ښې لوبې وکړې او دا یې د خپلو هڅو ثمره ده.

ده دا هم زیاته کړه، افغان کرکټ بورډ هیله من دی، چې غوره شوي درېواړه لوبغاړي چې وړاندې یې د افغانستان ۱۹ کلنې او ملي لوبډلې له پاره لوبې کړي؛ د دوی ټاکنه یو ځل بیا خپل ځای ثابته کړي او داروپا په سفر کې به د افغانستان کرکټ ملي لوبډلې په ګټه ښه ولوبېږي.

دا لومړی ځل دی، چې د پخواني کپټان نوروز منګل ورور احسان الله جنت د افغانستان کرکټ ملي لوبډلې په ګټه لوبېدو ته غوره کېږي.

د نسیم الله دانش په باور، د افغاستان کرکټ بورډ له خوا د لوبغاړیو انتخاب په حوصله او دقت سره ځکه کېږي، چې په راتلونکې کې زیانمن نه شي.

د ویلو ده، درېواړو غورو شویو لوبغاړیو د پاکستان حبیب بانک لوبډلې په کابل کې په یو ورځنیو او ۲ څلور ورځنیو سیالیو کې سلیزې جوړې کړې او د نورو افغان لوبغاړیو په پرتله په توپوهنه کې ښه وځلېدل.

د دې لوبغاړیو اعلان په داسې حال کې کېږي، چې افغان کرکټ بورډ خپله ۱۱ کسیزه لوبډله څو اونۍ مخکې د انګلستان ویزو د ترلاسه کولو له پاره هندوستان ته لېږل شوې ده، خو د دغه مهم سفر له پاره تر اوسه افغان کرکټ بورډ په رسمي توګه سیالیو ته نه وروستی تمریناتي کمپ نیولی او نه یې هم د غورو شویو لوبغاړیو نوملړ اعلان کړی دی.