د سولې مشورتي جرګې په دویمه ورځ، په ولسي جرګه کې د فراه د خلکو له استازې بلقیس روشن نه د بښنې غوښتنې موضوع لانجمنه شوه او جرګه یې د څو دقیقو لپاره بېنظمه کړه.
بلقیس روشن د جرګې په لومړۍ ورځ د ولسمشر غني د وینا پر مهال وویل: «وحشي طالبانو ته باج ورکول ملي خیانت» دی.
د لویې مشورتي جرګې د یوې کمېټې مشرې اصیلا وردګ د نن ورځې په لومړیو ساعتونو کې د جرګې د یوې بلې غړې له لوري د بلقیس روشن پر وړاندې ناوړه چلن او د هغې وهل وغندل او له نوموړې یې د رسمي بښنې غوښتنه وکړه.
د اصیلا وردګ دغه غوښتنه د جرګې د یوشمېر نارینه غړیو له سخت غبرګون سره مخ شوه. د جرګې یوه غړي دریځ ته ولاړ او ویې ویل چې د بلقیس روشن پلویان مفسد دي.
پرون پر ټولنیزو رسنیو یوه داسې ویډیو خپره شوه چې د جرګې یوې ګډونوالې د ولسي جرګې غړې بلقیس روشن وهي او بیا یې پر ځمکه را پرځوي.
د جرګې مشر عبدالله عبدالله په یوه ټلوېزیوني مرکه کې له بلقیس روشن نه بښنه وغوښته او د جرګې له غړیو یې وغوښتل چې د خپلو همکارانو اعتراض او غوښتنو ته درناوی وکړي.
د افغانستان د رسنیو د ملاتړ ټولنې یا نی هم د ولسي جرګې د یوې غړې د وهلو په غبرګون کې د یوې خبرپاڼې په خپرولو سره وویل چې د بیان ازادي باید وساتل شي او په ملي غونډو کې تر پښو لاندې نه شي.
نی زیاته کړه چې د اساسي قانون له مخې، د بیان ازادي له برید نه خوندی ده. دغې ادارې له ولسمشره وغوښتل چې دا پېښه په جدي توګه وڅېړي.
