د غزني ولایت د والي مرستیال محمد علي احمدي سلام وطندار ته وویل، چې دغه ۱۱ تنه پرون له غرمې وروسته د قرباغ ولسوالۍ پر لاره د وسله والو له خوا له موټرو د راښکته کولو وروسته نامعلوم ځای ته لېږدول شوي.
احمدي وايي، چې حکومت تر اوسه پورې د تښتول شویو کسانو د ساتلو د ځای په اړه اطلاعات نه لري.
له بل لوري د جاغوري ولسوال ظفر شریف سلام وطندار ته د پېښې پخلی وکړ او و يې ویل، چې د دغو کسان د خلاصون له پاره یې هڅې پېل کړي دي او تر اوسه پورې یې نتیجه نه ده ورکړې.
د جاغوري ولسوال وايي، چې له دې مخکې هم د یادې ولسوالۍ دوه مېرمنې او ۴ نارینه د وسله والو کسانو له خوا تښتول شوي و.
یاده دې وي، چې تر اوسه پورې هیڅ کومې ډلې د یادې پېښې مسؤلیت نه دی اخیستی.
تېره ورځ هم د جاغوري ولسوالۍ ۴ تنه اوسېدونکي د وسله والو له خوا لومړي له موټرو نه ښکته او وروسته په ډزو سره ووژل شول.
د دغو وژل شویو کسانو جسدونه د غزني اسفند په دښته کې ومندل او وروسته بیا د ولسوالۍ مرکز ته راوړل شول.
